Л.Энх-Амгалан: Надаас хулгай хийсэн хүнээс би уучлалт гуйхгүй

Боловсрол, шинжлэх ухааны сайд Л.Энх-Амгалан Монголын Үндэсний их сургууль гэсэн нэрийг төрд буцааж авахаа мэдэгдсэн. Харин өнөөдөр Монголын Үндэсний их сургуулиас Боловсрол, шинжлэх ухааны сайд Л.Энх-Амгаланг сургуулийн нэр төрд халдсан гэх шалтгаанаар шүүхэд өгч байна гэдгээ мэдэгдлээ. Тодруулбал, хуулийн этгээдийн хувьд нэр хүндээ сэргээлгэх зорилгоор Сүхбаатар дүүргийн иргэний хэргийн шүүхэд өнөөдөр нэхэмжлэл гарган ханджээ.

Тэгвэл Боловсрол, шинжлэх ухааны сайд Л.Энх-Амгалан сошиал хаягтаа “МҮИС бол МУИС-тай адилхан нэр авснаар олон мянган хүүхдийн ирээдүйн боловсролд эрсдэл үүсгэсэн, гэмт хэргийн шинж чанартай харагдаж байна. Монголын үндэсний их сургууль хэмээх нэр Монгол түмний өмч. Хэн нэгний хувийн компани үүнийг өмчилж, бизнес хийх эрх байхгүй. МҮИС намайг шүүхэд өгч байгаа бол би ч бас шүүхэд өгч шийдүүлнэ. Намайг уучлалт гуй гэсэн. Надаас хулгай хийсэн хүнээс би уучлалт гуйхгүй” гэжээ.