Согтуу жолоочийн балгаар ээж аавыгаа алдаж, орон гэргүй болсон АХ ДҮҮ хоёрыг байшинтай болгожээ

Дорнод аймгийн Хөлөнбуйр суманд 2020 оны 10-р сарын 15-наас 16-ныг шилжих шөнө согтуурах ундаа хэтрүүлэн хэрэглэсэн жолоочийн гэм буруутай үйлдлийн улмаас нэгэн гэр бүлд нөхөж баршгүй уй гашуу тохиолдож, аав, ээж нь амь насаа алдаж, 2 хүүхэд эрүүл мэндээрээ хохирч, өнчрөн үлдсэн билээ.

Цаашид ах дүү хоёрт амьдрах урам зориг, амьдралын баталгааг олгох зорилгоор аймгийн Гэр бүл, хүүхэд, залуучуудын хөгжлийн газрын дэргэдэх "Хүүхдийн нэгдсэн зөвлөл"-ийн санаачлагаар “ХАШАА, БАЙШИН”-тай болгох хөрөнгө босгох "Жигүүр хайрлая" аяныг зохион байгуулж, өнөөдөр биелэлээ олж байна.

Аймгийн Засаг дарга, аймгийн Хүүхдийн төлөө зөвлөлийн дарга М.Бадамсүрэн, Хөлөнбуйр сумаас сонгогдсон аймгийн ИТХ-ын төлөөлөгч Ч.Эрдэнэбат, аймгийн ГБХЗХГ-ын дарга Э.Жавхлан болон Хөлөнбуйр сумын удирдлагууд ах дүү хоёрт шинэхэн хашаа байшингийнх нь түлхүүрийг хүлээлгэн өглөө.

Аянд 21 төрийн байгууллага, 17 төрийн бус байгууллага, анги хамт олон, секц дугуйлан зэрэг нийт 38 аж ахуй нэгж, байгууллага, иргэдээс 19.716.930 төгрөг цугласан байна.

Хандивын аянд нэгдсэн томоохон дэмжлэгээс дурьдвал аймгийн Засаг даргын захирамжаар 2.050.000 төгрөгийн хандив, Дорнын Гал уяачдын холбооноос 3.200.000 төгрөг, Хөгжимт драмын театр 1.000.000 төгрөг, Хөлөнбуйр сумын Засаг даргын Тамгын газраас 2 хүүхдийн эмчилгээнд 11 сая төгрөг, хашаанд 4.800.000 төгрөгийн дэмжлэгийг тус тус үзүүлжээ.