Саид Моллаид амжилт хүссэн иргэн “Хийморийн сан” уншуулжээ

Монголын бөх Саид Моллаи 81 кг-ын хагас шигшээд шалгарч, медалийн төлөө барилдахаар боллоо.

Гүржийн Тато Григалашвилитэй хийсэн барилдаан түүний хувьд хүндхэн эхэлсэн. Гүрж залуу дархан үүрэх мэхээрээ вазари үнэлгээ авч давуу байдалтай болоод авав. Гэхдээ манай бөх сандарч тэвдсэнгүй тайван барилдсаар өмсөх мэхээр вазари авч, үнэлгээг тэнцүүлэв. Улмаар өрсөлдөгчөө үүрэх мэх хийхэд нь сөрж мордоод дахин вазари авч цэвэр ялалт байгууллаа.

Одоо Моллаи энэ олимпод одтой барилдаж, томчуудыг нураасаар яваа Австрийн бөх Шамил Борчашвилитэй барилдана. Тэд өмнө нь хоёр барилдаж ээлжлэн хожоод байгаа юм.

Тэгвэл Саид Моллаид амжилт хүссэн иргэн Ц.Өлзийтогтох Бэтүб хийдэд ном уншуулжээ. Тэрбээр энэ тухайгаа өөрийн нийгмийн сүлжээндээ "Саиед Моллаи-даа сайныг хүсээд өглөө эртлэн яваад Бэтүб хийдэд 5000 төгрөг төлөөд Хийморийн сан тэргүүтэй хэдэн ном захиалчихаад ирлээ. Энэ хүн эх орноосоо явах болсон нь Жудо бөхдөө чин сэтгэлээсээ дурласан бөгөөд Олимпийн аварга эсвэл медаль авах хүсэлтэй нь л холбоотой байх гэж таамагладаг. Тиймээс ийм их эрсдэл хийж хавчигдаж гадуурхагдаж яваа түүнийг дэмжихээс өөр аргагүй л гэж бодсоных шүү” хэмээжээ.