Зургадугаар сард төрсөн, зургаан жилийн хугацаатай сонгогдсон, зургаа дахь Ерөнхийлөгч ард түмэндээ ямар бэлэг барих вэ?

Шинэ Ерөнхийлөгч тангараг өргөмөгцөөө ажилдаа оржээ. Тангараг өргөх ёслолын дараа Монгол Улсын Ерөнхийлөгч У.Хүрэлсүхэд өнөөдөр УИХ-ын дарга Г.Занданшатар, Монгол Улсын Ерөнхий сайд Л.Оюун-Эрдэнэ нар бараалхаж баяр хүргэн, амжилт хүсчээ. Тэгвэл энэ үеэр Ерөнхийлөгч Үндэсний аюулгүй байдлын зөвлөлийг хуралдуулахаар зар тараасан байна. 

Уг хуралдаан 15 цагт 30 минутын орчимд эхэлсэн байна. Хуралдаанаар ирэх сараас хэрэгжилт нь дуусах зарим төрлийн халамжийн үйл ажиллагааг үргэлжлүүлэх асуудлыг авч хэлэлцэх юм. 

Тухайлбало, тог цахилгааны мөнгийг тэглэх, хүүхдийн 100 мянган төгрөгийг үргэлжлүүлэх эсэхийг авч хэлэлцэх тухай эх сурвалж мэдээлж байна. Ийнхүү Төрийн тэргүүн тангараг өргөсөн өдрөө ямар шийдвэр гаргаж, ард түмэндээ ямар бэлэг барих нь сонин байна? 

Ерөнхийлөгч У.Хүрэлсүх өнөөдөр тангараг өргөснийхөө дараа ард түмэндээ хандан " Монгол Улсын Ерөнхийлөгчийн энэхүү хариуцлагатай, нэр хүндтэй албыг хашихдаа гагцхүү төрийн хуулийг дээдлэн сахиж, өргөсөн тангарагтаа үнэнч байж, ард түмнийхээ сайн сайхан амьдралын төлөө өөрийн оюун ухаан, мэдлэг чадвар, дадлага туршлага, хүч чадлаа дайчлан ажиллах болно" хэмээсэн юм.