Шинэ Ерөнхийлөгчийнх "Их тэнгэр"-т амьдарна

Шинэ Ерөнхийлөгч ирэх долоо хоногийн баасан гарагт тангаргаа өргөнө. Ерөнхийлөгч У.Хүрэлсүх тангаргаа өргөхтэй зэрэгцэн "Их Тэнгэр"-ийн ам руу нүүхээр зэхсэн байна. Төрийн тахилгат Богдхан уулын аманд байрлах “Их тэнгэр”-т үе үеийн тусгай хамгаалалт бүхий тус газарт Монгол Улсын Ерөнхийлөгч, Ерөнхий сайд, Улсын их хурлын дарга нар бүрэн эрхийн хугацаандаа амьдардаг билээ.

Гэвч Х.Баттулга Ерөнхийлөгчийн хувьд “Их тэнгэр”-ийн аманд байрлах байранд амьдрахгүй гэдгээ мэдэгдэж,   Маршал Х.Чойбалсан, Ю.Цэдэнбал нарын амьдарч байсан өвлийн ордон буюу "Маршал харш"-д дөрвөн жил амьдарсан юм. “Маршал харш” нь люкс өрөө 2, хагас люкс өрөө 1, энгийн өрөө 4 бий. Мөн тохилог зоогийн газартай бөгөөд нэг ээлжинд 50-80 хүн хүлээн авах хүчин чадалтай аж. 

Маршал харшид Монгол Улсын анхны Ерөнхийлөгч П.Очирбат, хоёр дахь Ерөнхийлөгч Н.Багабанди нар нэг хэсэг өвлийн улиралд амьдарч байсан байна. Харин Ерөнхийлөгч Н.Энхбаяр, Ц.Элбэгдорж нар Маршал харшид амьдраагүй, өвөл, зунгүй “Их тэнгэр”-т амьдарсан байдаг.