С.Эрдэнийн хүү Энхтөгс: Сонгуулийн санал хураалтын байрны ширээн дээр суугаад ааваараа бахархан хайрлаж, хүндэтгэн хэсэг суулаа

 Ардчилсан намаас нэр дэвшигч С.Эрдэнийн хүү Энхтөгс саналаа өгчээ. Тэрбээр энэ талаар өөрийн нийгмийн сүлжээндээ "Хүн хүний нэр дэвшигчээ сонгох эрх нь тухай хүний эрхийн асуудал тул энэ удаад эргэн тойрны хүмүүстээ, танилууддаа “Аавыг минь дэмжээрэй” гэж шалсангүй сонгуультай золголоо. Угаасаа надаар дамжуулаад миний аавыг ямар хүн бэ гэдгийг мэдэх нэг  нь сайн мэднэ. Сонгуулийн санал хураалтын байрны ширээн дээр суугаад аавынхаа нэрийг хараад ямар их хичээл зүтгэл, ямар их тэвчээртэй зан, ямар мундаг тэмцэгч бас удирдагч гэдгээр нь бахархан хайрлаж, хүндэтгэн хэсэг суулаа.

Хэлсэн нэг өгүүлбэрийг нь ч сонсож үзээгүй, царай зүсийг нь амьдаар нь харж ч байгаагүй хүмүүс элэглэх, муулах зэргийг хараад уур хүрэх ч, хүссэн үгээ хэлэх үзэл бодлоо илэрхийлэх эрх, эрх чөлөөнийх нь төлөө бид явж байгаа тул шүдээ зуугаад л өнгөрлөө. Өнгөөр тодотгон ялгаж будсан тэр жижигхэн нүд магадгүй та бидний амьдралд хүчтэйгээр нөлөөлөх учраас хэрсүү байж зөв сонголтоо хийгээрэй. Эцэст нь хэлэхэд бүгд сонгуульдаа идэвхитэй оролцож, саналаа өгөөрэй” гэжээ.