Г.Занданшатар: Дотоод зөрчил тэмцлээ өөрсдөө шийд Их хурал шийддэг газар нь биш

УИХ-ын чуулганы өнөөдрийн хуралдааны эхэнд төв талбайд өлсгөлөнгийн үйл ажиллагаанд оролцож байгаа гишүүд байр сууриа илэрхийллээ. 

УИХ-ын гишүүн Ц.Туваан “Би ёстой жудагтай байхыг эрмэлздэг. Та нарын яриад байгаа хууль дүрэм чинь биелэгдэж байгаа нь хаа байна. Жагсаж цуглаж, өлсөх нь бидний асуудал. Тэр хуульд чинь УИХ-ын гишүүний бие, унаа тэргэнд халдахгүй гэсэн заалт байдаг юм бол тэрийгээ хэрэглэ. Байдаггүй юм бол байдаггүй гэдгээ хэлчих. Бид дотроо хагараагүй гэдгээ үзүүлж байгаа. Та нар агентлагуудаараа хуурамч тамга даруулж асуудлыг эхлүүлсэн. Бид цагдаагийн даргатай ч холбогдож чадахгүй байна. Нөхцөл байдал ийм л байна" хэмээлээ. 

Үүнд УИХ-ын дарга "УИХ хууль тогтоодог байгууллага болохоос хууль сахиулдаг байгууллага биш. Хуулиа ойлгохгүй. Дотоод зөрчил тэмцлээ дотроо л шийд. УИХ тэрийг чинь шийддэг газар биш" гэсэн юм. 

Харин үүний дараа Ж.Батсуурь гишүүн "Бүх машиныг зогсоож биед, машинд нэгжлэг хийж байна. Улстөрийн тэмцэлд ороод 12 цаг боллоо. Таны 76 гишүүний долоо нь хүйтэн шалан дээр хэвтэж байна. Алга дарам эсгий, балга ус оруулахгүй байна. Бид гэдсэндээ юмгүй, зузаан хувцастай нэг километр алхаад хамаг тамир тэнхээ дуусаж байна. М.Оюунчимэг гишүүнээ Адъяасүрэн гишүүнийг очиж эргээчээ. Урьд шөнө тэр эмэгтэй дороо дэвсэх юмгүй, нөмрөх юмгүй хонолоо. Хууль зүйн сайд аа, Хууль зүйн байнгын хорооны дараа энэ Монгол Улс чинь цэрэгжсэн улс болчихлоо. Долоон гишүүнийхээ нөхцөл байдлыг хараач. Бидэнд балга ус өгчөөч" гэсэн юм.