А.Гансүх : Н.Баасанцогт өмгөөлөгчтэй би танил. Намайг ЗТХ-ийн сайд байхад МИАТ-д ажилладаг байсан өмгөөлөгч хүн. Гэхдээ одоо ямар ч холбоогүй. Тэр хүн манай байгууллагад ажиллаж байгаагүй, ажилладаггүй гэдгийг дахин хэлье.

ҮАБЗ-ийн нарийн бичгийн дарга А.Гансүх өнөөдөр мэдээлэл хийх үеэрээ сэтгүүлчдийн асуултад хариулав.

-Таныг шүүхэд нөлөөлсөн, эрүүдэн шүүх ажиллагаанд оролцсон байж болзошгүй гэх мэдээллийг өчигдөр Ерөнхий сайд хийсэн. Энд ямар тайлбар өгөх вэ?

-Шүүгчийн эрх зүйн байдлын тухай хуульд нэг заалт орсон байсан. Хэрвээ шүүхийн шүүгч нар хүний эрх, эрх чөлөөг зөрчсөн үйл ажиллагаа явуулбал ҮАБЗ-өөр зөвлөмж гарсан тохиолдолд эрхийг түдгэлзүүлэх боломжтой хуулийн заалт байсан. Гэхдээ энэ заалт одоо хүчингүй болсон. Үүнээс өөрөөр ҮАБЗ шүүгчдэд нөлөөлөх боломжгүй байсан.Бидний зүгээс шүүгч, шүүхэд нөлөөлөх боломжгүй. 

-Та өмгөөлөгч Б.Баасанцогт гэдэг хүнтэй ямар холбоотой вэ, таних уу?

-Би Баасанцогттой танил. Намайг Зам тээврийн сайд байхад МИАТ-т өмгөөлөгчөөр ажилладаг байсан хүн. Одоо холбоогүй байгаа. 

-ҮАБЗ-ийн албан тушаалтнууд ямар зорилготой хил давж, ОХУ-д очсон юм бэ?

-Хэвлэлд бичсэн гурван ажилтан бол ҮАБЗ-ийн Ажлын албаны ажилчид мөн. Харин ямар ажлаар явсныг нь хэлэх боломжгүй. Энэ бол хамгийн наанадаж манай албаны нууц, цаашлаад төрийн нууцад хамаардаг учраас олон нийтэд мэдээлэхгүй. Нууцын зэрэглэлтэй учраас задалж чадахгүй. Хамгийн гол нь хуулийн дагуу явсан ажил гэдгийг хэлж чадна.