МУ-ын газар нутгаар дамжуулан барих хийн хоолойн ТЭЗҮ энэ оны эхний улиралд бэлэн болно

Монгол Улсын газар нутгаар дамжуулан барих хийн хоолойн “Сибирийн хүч- 2” төслийн талаар  “Газпром” НХН-ийн Удирдах зөвлөлийн дарга Алексей Миллер ОХУ-ын Ерөнхийлөгч Владимир Путинд танилцуулсан байна. 

Тэрбээр, Монгол Улсын нутаг дэвсгэрээр дамжин өнгөрөх ТЭЗҮ-г боловсруулж байна.Монгол Улсын нутаг дэвсгэрээр дамжуулан хийн хоолой барих төслийг хариуцан ажиллах “Тусгай зориулалтын компани”-ийг  байгуулсан. Хийн хоолойн төслийн ТЭЗҮ 2021 оны эхний улиралд бэлэн болгоно. Одоогоор техникийн болон эдийн засгийн урьдчилсан судалгаа шинжилгээний хүрээнд дүгнэлт хийж үзэхэд энэ төсөл нь техникийн хувьд хэрэгжих боломжтой бөгөөд эдийн засгийн хувьд ашигтай хэмээн баттай хэлж чадна хэмээн онцолжээ.

Байгалийн хийн төсөл нь Монгол Улсад 1990 оноос хойш 30 жилийн турш хүлээлттэй байсан төсөл юм. Монголын тал сүүлийн арав гаруй жил ОХУ-ын талд энэ талаар санал хүсэлт тавьсаар ирсэн түүхтэй. Харин өнгөрсөн онд Ерөнхий сайд У.Хүрэлсүх ОХУ-д хийсэн айлчлалынхаа үеэр энэхүү төслийн хэлэлцээрийг  баталгаажуулжээ. 

ОХУ БНХАУ-ын хамтарсан хоёр дахь хийн хоолой Оросын Арктик дахь Ямалийн хойгоос БНХАУ-ын зүүн болон төвийн мужууд руу   50 тэрбум шоо метр хүртэлх хийг тээвэрлэх аж. Манай улсын газар нутгаар 1000 орчим үргэлжлэх хийн хоолойг Монголын талаас "Эрдэнэс Монгол" ХК хариуцсан бөгөөд дэргэдээ төслийн нэгж байгуулан ОХУ-ын Төрийн мэдлийн “Газпром” НХН, дэлхийн гурав дахь том газрын тосны компани болох БНХАУ-ын нефть, хийн үндэсний корпораци /CNPC/-тай хамтран хэрэгжүүлэх юм.

Видеог эндээс үзнэ үүhttps://www.facebook.com/erden...