News Paparazzi: Э.Оюунболдод унасан таван бөх цол, чимгээ ахиулахаар Ерөнхийлөгчийн зарлиг хүлээж байна

Улсын аварга Э.Оюунболдын нэхэмжлэлтэй, Үндэсний их баяр наадмыг зохион байгуулах хороонд холбогдох хяналтын шатны шүүх хурал өнөөдөр болсон талаар бид мэдээлсэн. Улмаар анхан болон давж заалдах шатны шүүхээс гаргасан барилдах эрхийг нь хасах шийдвэрийг хүчингүй болгож шийдвэрлэсэн юм. 

Харин Э.Оюунболдын барилдаж давсан даваа бүрийг хүчингүйд тооцох, Э.Оюунболдод өвдөг шороодсон бөхчүүдийн давааг ахиулж, цол, чимгийг олгуулах, Э.Оюунболдод олгосон Монгол Улсын аварга цолыг хураах саналыг хэвээр үлдээсэн байна. 

Дээд шүүх ийнхүү шийдвэрээ гаргаснаар одоо Ерөнхийлөгч зарлиг гаргахыг хүлээх л үлдлээ.  2019 оны үндэсний их баяр наадмаар Э.Оюунболдод унасан бөхчүүдэл цол, чимэг нөхөж олгох юм. 2019 оны наадмын дараахан тухайн үед Ерөнхийлөгчийн тамгын газрын дарга байсан З.Энхболд мэдээлэл хийх үеэрээ "Гурван шатны шүүхээр асуудал шийдэгдсэний дараа Ерөнхийлөгч зарлиг гаргана" хэмээж байсан билээ. 

Ямар бөхчүүд цол, чимэг нэмэх вэ гэдгийг танилцуулъя. 

Улсын начин Н.Мустафа

Тавын даваанд өвдөг шороодсон бөгөөд тухайн үедээ аймгийн арслан цолтой байлаа. Харин энэ жилийн наадмаар улсын начин цол хүртсэн учраас тэрээр чимэг нэмэх болж байна.

Улсын начин Б.Цэдэнсодном

Улсын начин цолны болзол хангаад байсан аймгийн арслан Б.Цэдэнсодном зургаагийн даваанд Э.Оюунболдод өвдөг шороодсон. Тэгэхээр улсын начин Б.Цэдэнсодномд улсын харцага цолыг нөхөж олгох юм байна. 

Улсын харцага Д.Анар

Долоогийн даваанд Э.Оюунболд шинээр харцага цолны болзол хангаад байсан улсын начин Д.Анартай барилдсан. Тиймээс улсын харцага Д.Анарт улсын заан цол олгоно гэсэн үг.

Улсын арслан Ц.Содномдорж

Наймын даваанд Э.Оюунболд улсын арслан Ц.Содномдоржтой барилдсан. Тэрбээр Үлэмж бадрах чимэгтэй болно. 

Улсын аварга Н.Батсуурь

Э.Оюунболд үзүүр, түрүүнд улсын аварга Н.Батсуурьтай барилдаж түрүүлсэн. Тиймээс улсын аварга Н.Батсуурь улсын даян аварга цолтой болох юм.