News paparazzi: МУГЖ С.Жавхлан энэ сарын 23-нд "UB Palace"-т дөрөв дэх удаагаа тоглохоор боллоо

Монгол Улсын гавьяат жүжигчин С.Жавхлан саяхан "Монголоороо байгаасай" тоглолтоо Монгол бөхийн өргөөнд хийсэн билээ. Гэвч түүний тоглолтыг үзэж амжаагүй иргэдээс дахин тоглож өгөхийг хүссэн маш олон хүсэлт ирсэн учраас тэрээр энэ сарын 23-нд "UB Palace"-т дөрөв дэх удаагаа тоглохоор болжээ.
Энэ талаар түүнээс өөрөөс нь тодруулахад “Бөхийн өргөөнд тоглох миний  21-ний тасалбар дуусаж байна. Ажлын өдөр ч гэсэн бүх тасалбар зарагдаж дууссан. Мөн үзэгчдээс тоглолт үзэх хүсэлт маш их ирж байгаа тул Улаанбаатар хотынхоо баруун хэсгийн үзэгч, сонсогчиддоо зориулан 10-р сарын 23-нд “UB palace”-т тоглох шийдвэрийг сая гаргалаа. 
Та нарыгаа ажлын өдрөөр түгжрэлд саатаагаад яахав мөн шатахуун тос, цаг завыг чинь үрснээс би 200-300 уран бүтээлчээ аваад тань руу нүүхээр шийдлээ. Хотын нэг захаас нөгөө зах руу 3000-4000 хүн түгжирч байснаас Жавхлан чинь тоглолтод оролцож байгаа 200-300 уран бүтээлчээ дагуулаад тайзаа аваад үзэгч түмэн рүүгээ хотын баруун тийш Улаанбаатар палас руу нүүгээд очъё, Жавхлан чинь тань рүү нүүж явна” гэв. Дашрамд дурьдхад аравдугаар сарын 23-нд “UB palace”-т товлогдсон тоглолт 19:00 цагаас эхлэх юм байна.

Ж.Болд