News paparazzi: Нийлээд удаагүй хоёр нэгнээ үгүйсгэж эхлэв

УИХ-ын гишүүн асан Ж.Батзандан, Л.Болд нар өмнөх парламентын үед АН-аасаа гарч УИХ дахь намын бүлгээ задалж байлаа. “АН-д багтаж шингэх газаргүй боллоо, биднийг намаасаа хөөлөө” хэмээн гомдоллож явсан тэд удалгүй шинэ нам байгуулж 2020 оны сонгуульд оролцсон ч хоёулаа ялалт байгуулж чадаагүй. Үе үе олны өмнө гарч попордог байсан Шударга иргэдийн нэгдсэн эвсэл намын дарга Ж.Батзандан УИХ-ын сонгуулиас хойш өнөөдрийг хүртэл усанд хаясан чулуу мэт алга болсон. Харин Л.Болд нь Монгол Улсын Ерөнхийлөгчийн зөвлөхөөр томилогдож төрийн ордонд тухалсан хэвээр. АН-тай дахин хувь заяагаа холбохгүй мэт авирлаж явсан тэд буцаад АН-ынхаа бөөрөн наалдаж орон нутгийн сонгуульд хамтдаа оролцож байгаа.

ШИНЭН-ын Төв зөвлөлийн дарга Л.Болд хэдхэн хоногийн өмнө хэвлэлд ярилцлага өгөхдөө “Орон нутгийн сонгуулийн дараа намаа АН-тай нэгтгэнэ” хэмээн байр сууриа илэрхийлсэн. Харин УИХ-ын сонгуулийн дараа намын даргын албан тушаалаа хүлээлгэн өгөхөө мэдэгдсэн ШИНЭН-ын дарга Ж.Батзандан өнөөдөр мэдээлэл хийхдээ Л.Болдынхоо байр суурийг үгүйсгэлээ. Нийлж нэгдээд шинэ нам байгуулсан тэд нэгнээ үгүйсгэж эхэлснээс харвал харилцаа нь таагүй байгаа бололтой. Тэдний эсрэг тэсрэг байр суурийг хүргэе.

ШИНЭН-ын Төв зөвлөлийн дарга Л.Болд: -Одоо шинэчлэгдэж байгаа АН зөв байр суурин дээрээ ирээд, эв нэгдлээ хамгаалаад орон нутгийн сонгуульд орж байна. Цаашдаа Шударга иргэдийн нэгдсэн эвсэл  нам, АН нэгдэх процесс явагдана.

ШИНЭН-ын дарга Ж.Батзандан: -ШИНЭН АН-тай нэгдээгүй. Сөрөг хүчний намууд, сонгуулиа луйвардуулсан улс төрийн хүчнүүд хамтран ажиллах ёстой. Юу юугүй өвөр түрийдээ давхиж орох нь өнөө маргаашдаа зөв зүйл биш. ШИНЭН-ын даргын суудлаа өгөх тухайгаа мэдэгдсэн боловч намын Төв зөвлөл өнөөдрийг хүртэл хуралдаж шийдвэрлээгүй байгаа.

Эх сурвалж: eagle.mn