News paparazzi: ​Иргэн П.Энхтөгсийг цагдаагийн байгууллагаас дарамталсан уу

Өнгөрсөн долоо хоногт Ерөнхий сайд У.Хүрэлсүх Дархан, Сэлэнгэ аймгуудад ажиллаж, дээрх аймгуудад явагдаж байгаа бүтээн байгуулалтын ажилтай танилцсан билээ.

Ерөнхий сайд буцах замдаа Дархан-Уул аймгаас өдрийн галт тэргэнд суусан бөгөөд үүнээс үүдээд тухайн үед явж байсан зорчигчдын явах цагт нь өөрчлөлт орсон, иргэд олон түмэн галт тэрэгний өртөөн дээр олон цаг хүлээсэн гэх шүүмжлэл гарч эхлээд байгаа юм.

Харин энэ үеэр иргэн П.Энхтөгс цагдаа нарт торгуулсан гэх мэдээлэл олон нийтийн цахим сүлжээнд тараад байгаа бөгөөд учир нь тэрээр өөрийн твиттер хуудастаа “Ерөнхий сайд Хүрэлсүх Дарханы вагоныг 2 цаг саатуулснаас болж гэнэт хөдөлсөн вагон руугаа амжих гэж гүйсэн намайг цагдаагийн албан хаагчийн шаардлага биелүүлсэнгүй гэж 250 мянгаар торголоо. Ийм новшийн зүйл ч байх гэж” хэмээн бичжээ.   

Зарим эх сурвалжаас авсан мэдээллээр “Иргэн П.Энхтөгс нь Дарханаас Улаанбаатар явах өдрийн 14:00 цагийн галт тэрэгний билеттэй байсан бөгөөд түүнийг явахаар иртэл Ерөнхий сайд өмнөх галт тэргээр явсан учраас ойрхон явж болохгүй гээд галт тэргээр явах гэж байсан бүх хүмүүсийг хоёр цаг хүлээлгэсэн ба харин галт тэрэг 16:10 цагт хөдөлнө гэсэн байсан ч, 16:00 цагт гэнэт хөдөлсөн байна.

Тэгээд тухайн үед иргэн  П.Энхтөгс сандарсандаа галт тэргэндээ суух гээд араас нь гүйж байтал хоёр цагдаа “чи боль, саатуулан шалгах байр луу яв” гэжээ. Тэгэхээр нь тэрээр “галт тэрэгнээсээ хоцрох гээд байна. Наадах руу чинь орж яадаг юм” гэж уцаарлангуй хэлсэн аж.

Гэтэл цагдаагийн албан хаагч түүний гадуур хувцаснаас чирч, Зөрчлийн тухай хуульд заасны дагуу цагдаагийн  албан хаагчийн шаардлагыг биелүүлээгүй гэдэг үндэслэлээр 250 мянган төгрөгөөр торгосон бөгөөд тэрээр галт тэргэндээ ч сууж чадалгүй,  торгуулсан байна. Харин иргэн П.Энхтөгс энэ талаар өөрийн цахим хуудсан дээрээ бичтэл, цагдаагаас “Торгуулийн хуудсыг олон нийтэд тавих нь буруу, үүнийгээ устга” гэсэн шаардлага тавьжээ.

Ж.Бат