News paparazzi :ЖҮЖИГЧИН Г.УНДАРМАА НӨХӨРӨӨ ТАНИЛЦУУЛАВ

Саяхнаас жүжигчин Г.Ундармаа нөхөртэйгээ хамт авахуулсан зургаа олон нийтэд ил болгох болсон. Тэдний танилцаж, учирсан түүх нь тун сонирхолтой. Жүжигчин бүсгүй АНУН компанид борлуулалт хариуцсан ажилтан байхдаа нөхөрөө анх олж харсан гэдэг. Түүний нөхөрийг Батжаргал гэдэг бөгөөд ойр тойрныхон нь Баажаа хэмээн дууддаг.

Даруухан, нөхөрсөг, бас спортлог нөхрөө  волейбол тоглож байхыг нь харангуутаа л жүжигчин бүсгүйн сэтгэл алдарчээ. Тийм ч учраас халуухан дурлалынхаа төлөө би өөрөө гүйж байгаад ханьтайгаа суусан гэж ярьсан удаатай.

Харин нөхрийнх нь хувьд анх Г.Ундармаагийн хөлийнх нь хуруунд татагдсан гэнэ. Сүүлд гэр бүл болсон хойноо Г.Ундармаа нөхрөөсөө “Чи хэзээнээс намайг эр хүний нүдээр харж эхэлсэн бэ” гэж асуухад, нөхөр нь “Нэг удаа чиний хөл рүү харсан чинь чигчий хуруу чинь сандаалныхаа улнаас илүү гараад шалан дээр гишгэж байсан. Тэгээд их эгдүүтэй санагдаад, тэрнээс хойш л өөрийн мэдэлгүй хараад байдаг болчихсон” гэж хэлсэн гэдэг.

Г.Ундармаагийн нөхөр Алтайн барс клубын холбон тоглогч бөгөөд волейболын спортын хорхойтнуудын эчнээ сайн танил. Батжаргалынх гэдэг энэ айл эрдэнэ мэт ганц охинтой. Охиныг нь Бэрцэцэг гэдэг бөгөөд урд хөршийн хамгийн нэр хүндтэй их сургууль болох Циньхуа их сургуульд суралцдаг гэнэ. Хичээлийнхээ хажуугаар онлайн шоп ажиллуулдаг овсгоотой сүрхий охин гэнэ лээ.

Сайн ханийн хайранд бөмбөрч, ажил амьдралдаа амжилт дүүрэн яваа цоглог бүсгүй Г.Ундармаа өөрийнхөө тухай нэгэнтээ  "Арабын шейхийн эхнэр шиг л сэтгэл хангалуун явдаг" хэмээн нэгэн ярилцлагадаа дурдсан байдаг.

Ханийнхаа ажил төрөлд хамгийн дотны зөвлөгч туслагч, бас сайн ар тал нь байж чаддаг нөхөр нь Г.Ундармаад үе үе харц булаасан зохиомжтой цэцгийн баглаа бэлэглэж гэнэтийн сюрприз барьдаг сурагтай.

Гэр бүлийн аз жаргал гэж чухам юу байдгийг хайр дүүрэн амьдралаараа харуулж яваа энэ сайхан гэр бүлд сайн сайхныг хүсье.