Европын орнууд Хятадад үйлдвэрлэсэн эмнэлгийн хангамжийг буцаав

Европын зарим орнууд коронавирусийн тархалттай тэмцэхэд зориулж Хятадын илгээсэн эмнэлгийн хангамжийг стандартын шаардлагад нийцээгүй гэх шалтгаанаар хүлээн авахаас татгалзжээ.

Тухайлбал, Испанийн засгийн газар Хятадад үйлдвэрлэсэн 60 мянган оношлуурыг чанарын шаардлага хангаагүй, зөв оношлох 30 хувийн магадлалтай хэмээн буцаажээ. Гүрж, Турк, Чех улсууд мөн адил оношлуурыг захиалсан байсан нь эргээд асуудал үүсгэсэн байна. Испани улсын хувьд Хятадаас 950 агааржуулагч, 5.5 сая оношлуур, 11 сая бээлий, 500 сая амны хаалт зэрэг нийт 467 сая ам.долларын бүтээгдэхүүн захиалаад байгаа аж.

Харин Нидерланд улс Хятадад үйлдвэрлэсэн 600 мянган амны хаалтыг захиалж, эрүүл мэндийн ажилтнууддаа тараажээ. Тус амны хаалт хүмүүст таарахгүй, шүүлтүүр нь ажиллахгүй байсан хэмээн албаны хүмүүс мэдээлсэн байна.

Хятадын засгийн газар бусад улсуудад Covid-19-ийн тархалттай тэмцэхэд нь тусалж оношлуур болон бусад эмнэлгийн хангамжийг илгээж байгаа. Гэсэн хэдий ч тус улсын хувийн компаниудаас захиалсан эмнэлгийн хангамж стандартад нийцээгүй гэх шүүмжлэлийг дагуулаад буй.