Ч.Ганхуяг МҮХАҮТ-ийн ерөнхийлөгч болвол цалингүй ажиллахад ч бэлэн гэжээ

 Мөнгөтэй бийлэгжүү хүмүүс төрийн өндөр албан тушаалд цалингийн төлөө ажилладаггүй нь тодорхой. Тэгвэл Монголын Үндэсний Худалдаа Аж Үйлдвэрийн Танхим (МҮХАҮТ)-ын  ерөнхийлөгчийг сонгох сонгуульд нэрээ дэвшүүлээд байгаа “Ард санхүүгийн нэгдэл”-ийн гүйцэтгэх захирал Ч.Ганхуяг “Цалингүй ажиллана” гэх амлалт өгөөд байна. 

Энэ тухайгаа тэрбээр “Би цалингүй ажиллана. Тэнд сүүлийн дөрвөн жил ажил яваагүйн нэг шалтгаан нь мөнгийг хэн удирдах вэ, хэн хэдэн төгрөгийн цалин авах вэ гэдэг жижигхэн “гал тогооны” хэрүүл явагдсан. Би үүнээс өөрийгөө хамгаалж байгаа. Ийм зүйлд би цагаа зармааргүй байна. “Ард кредит” IPO, Хөрөнгө оруулагч үндэстэн гээд хийх ажил маш их байна. Тэгэхээр өөрөөсөө гаргаж ирж байгаа, хулгайлаад аваачиж байгаа жаахан цагаа зорилгодоо л зарцуулна. Тэрнээс жижиг зүйл ярьсан хэрүүлд би оролцмооргүй байна. Надад тэр хэрүүл хэрэггүй” гэх тайлбар хийгээд байна.

МҮХАҮТ-ийн ерөнхийлөгчийг тодруулах сунгаанд  энэ удаад тус танхимын ерөнхийлөгч Б.Лхагважав, “Ард санхүүгийн нэгдэл”-ийн гүйцэтгэх захирал Ч.Ганхуяг, UFC группийн ТУЗ-ийн дарга О.Амартүвшин, БНН-ын дарга Б.Жаргалсайхан нар өрсөлдөхөө албан ёсоор мэдэгдээд буй.