ЧУУЛГАН: УИХ-ын шинэ даргын томилгоог хэлэлцэнэ

УИХ-ын шинэ даргын өнөөдөр үүрэгт ажилд нь томилно. Өөрөөр хэлбэл өнөөдөр УИХ-ын даргад нэр дэвшээд буй Монгол Улсын сайд, Засгийн газрын хэрэг эрхлэх газрын дарга Г.Занданшатарыг УИХ-ын даргад томилох эсэхийг байнгын хороо болон УИХ-ын нэгдсэн чуулганаар хэлэлцэх юм.

Өчигдөр хуралдсан МАН-ын Удирдах зөвлөлийн хурлаас УИХ-ын даргад түүний нэрийг дэвшүүлсэн юм. Ерөнхий сайд түүнийг нэр дэвшүүлсэн бөгөөд Удирдах зөвлөлийнхөн 100 хувийн саналаар Г.Занданшатарыг дэмжсэн юм.

Тэгвэл үүний дараагаар буюу орой 18 цагаас УИХ дахь МАН-ын бүлэг уг томилгооны асуудлыг ээлжит бус хурал зарлаж хэлэлцсэн бөгөөд бас л 100 хувийн саналаар түүнийг УИХ-ын даргад "сойхоор" болсон юм.

Тиймээс өнөөдөр эхлээд 09 цагаас Төрийн байгуулалтын байнгын хороогоор УИХ-ын даргын томилгоог хэлэлцэж санал дүгнэлт гаргах бөгөөд уг санал дүгнэлтийг 10 цагаас хуралдах УИХ-ын нэгдсэн чуулганаар хэлэлцүүлэхээр төлөвлөөд байна.

Нэр дэвшигчийн хувьд УИХ-д гурван ч удаа сонгогдож, хоёр удаа төрийн сайдын албан тушаалыг хашиж байсан туршлагатай нэгэн юм. Өнгөрсөн 11 сараас эхэлсэн улс төрийн буцалсан "цаг агаар" ийнхүү учир зүйгээ болох бололтой. Ямартаа ч цагаан сарын өмнө УИХ шинэ даргатайгаа "золгох" нь тодорхой боллоо.

Тэгвэл үүний дараагаар гүйцэтгэх засагтай холбоотой бас нэгэн томилгоо нэмэгдэж байгаа нь Монгол Улсын сайд бөгөөд Засгийн газрын хэрэг эрхлэх газрын даргын суудал хэнд очих вэ гэдэг юм. Одоогийн байдлаар ЗГХЭГ-ын даргаар Л.Оюун-Эрдэнийг "зүтгүүлэх" байх гэсэн таамгийг зарим хэвлэлүүд болон сошиал сүлжээнийхэн гаргаж байгаа юм. Ер нь ч энэ үнэн ортой шуум байх.

Магадгүй залуу үеэ дэмжих бодлого баримталбал уг суудлыг залуучуудаас сонгон өгч болох л юм. Гэхдээ ЗГХЭГ-ын даргын томилгоог дутуу байгаа Боловсрол, соёл, шинжлэх ухаан спортын сайд болон Зам тээврийн хөгжлийн яамны сайдуудтай хамтад нь багцалж оруулж ирэх болов уу гэдэг таамгыг зарим эх сурвалжууд өгч байна.

Ингээд төгсгөлд нь өнөөдөр УИХ-ын даргад нэр дэвшиж буй ЗГХЭГ-ын дарга Г.Занданшатарын товч намтрыг хүргэж байна: 

ТӨГССӨН СУРГУУЛЬ, МЭРГЭЖИЛ:

• 1987 онд 10 жилийн 77-р дунд сургууль
• 1992 онд ОХУ-ын Эрхүү хотын Улсын Ардын Аж Ахуйн дээд сургуулийг Санхүү эдийн засагч
• 2012 онд ОХУ-ын Байгалийн Эдийн засаг, эрх зүйн улсын их сургууль

АЖИЛЛАСАН БАЙДАЛ:

• 1992-1995 онд Зах зээлийн коллеж (ХҮДС) Маркетинг бизнес судалгааны төвд судлаач, Санхүү Эдийн засгийн тэнхимд багш
• 1995-1998 онд Хөдөө Аж Ахуйн банк Эдийн засагч, Валютын хэлтсийн ажилтан, бүтцийн өөрлөлтийн менежер, Валютын хэлтсийн захирал,
• 1998-2000 онд Монгол Банк Сургалтын төвийн менежер, Хөдөө Аж Ахуйн банкинд Монгол банкны бүрэн эрхт төлөөлөгч, Эрх хүлээн авагчийн багийн гишүүн
• 2000-2003 онд ХААН Банк Дэд захирал
• 2003-2004 онд Монгол Улсын Хүнс Хөдөө аж ахуйн дэд сайд
• 2004-2008 онд Монгол Улсын Их Хурлын гишүүн
• 2008-2012 онд Монгол Улсын Их Хурлын гишүүн
• 2009-2012 онд Гадаад харилцааны сайд
• 2012-2013 онд Монгол Ардын Намын Ерөнхий нарийн бичгийн дарга
• 2013-2015 онд АНУ-ын Стэнфордын их сургуулийн Хөгжил, Ардчилал Хуулийн засаглалын хүрээлэнд судлаач
• 2016 оноос Монгол Улсын Их Хурлын гишүүн
• 2017 оноос Монгол Улсын Засгийн газрын гишүүн, Монгол Улсын сайд, Засгийн газрын Хэрэг эрхлэх газрын дарга

ШАГНАЛ

• 2004 онд “Санхүү Банкны тэргүүний ажилтан”
• 2006 онд “Эдийн засаг санхүүгийн тэргүүний ажилтан”
• 2009 онд “Алтангадас” одон
• 2011 онд “Онц бөгөөд бүрэн эрхт элчин сайд” 

ГАДААД ХЭЛ

• Англи, Орос