БАРИМТ: Н.Оюундарь гишүүн 80%-ийг нь эзэмшдэг компаниа хүүгийнхээ гэж "булзааруулав"

Улстөрчид төсвөөс нэн хөнгөлөлттэй зээлийг хувааж авдаг баримтуудыг бид цувралаар хүргэсээр байна.

Жижиг, дунд үйлдвэрийг хөгжүүлэх сангаас хамаарал бүхий компани нь зээл авсан албан тушаалтнуудын буухиаг УИХ-ын гишүүн Н.Оюундарь үргэлжлүүлж, баримтаар нотлогдлоо.

Энэ талаар УИХ-ын гишүүн Н.Оюундарь Zarig.mn сайтад өгсөн тодруулгадаа "Манай хүүгийн компани П.Сэргэлэн сайдын үед зээлийн шалгуурыг хангаад, зээл авахаар тодорхойлогдсон байсан. Гэсэн ч төсөв мөнгөгүй учраас авч чадаагүй байдаг. 2016 онд шалгуурыг нь хангасан ч сүүлд Б.Батзориг сайдын үед зээлээ авсан.

Миний хүү Сэлэнгэ аймагт фермерийн аж ахуй эрхлэх төслөөр зээл авсан" хэмээн тайлбар өгчээ.

Гэсэн ч гишүүн 2017 оны Хөрөнгө орлогын мэдүүлэгтээ хүүгийнхээ хэмээн тайлбарлаж буй "Рэд стар клуб" ХХК-ийн 80 хувийг эзэмшдэг болохоо мэдүүлжээ. 

Аливаа компанийн эзэмшлийн дийлэнх буюу 80 хувийг эзэмшинэ гэдэг нь "Рэд стар клуб" ХХК УИХ-ын гишүүн Н.Оюундарийн л компани гэсэн үг билээ. Үүнээс бултах аргагүй. 

Баримт 1: 2018 онд ЖДҮДС-аас зээл авсан компаниуд /Хүснэгтийн 74 дугаарт "Рэд стар клуб" ХХК байна/

Баримт 2: Н.Оюундарь гишүүний хөрөнгө орлогын мэдүүлэгт бөглөсөн эзэмшдэг компанийн жагсаалт

УИХ-ын гишүүд дундаа гэр бүлийн орлогоороо гуравдугаарт эрэмбэлэгддэг буюу жилийн 1.4 тэрбумын орлоготой Н.Оюундарь гишүүний гэр бүл жижиг, дунд бизнес эрхлэгч мөн үү?

IKON.MN