Үндэсний “Ивээл” брэндийн нэг жилийн ойн загварын шоу боллоо

Сүүлийн үед хувцасны зах зээлд үндэсний брэндүүд олноор гарах болсон. Тэр хэрээр хэрэглэгчдийн хүсэл сонирхол өөрчлөгдөн, сонголт нэмэгдэж байна. Тийм учраас “Ивээл”  брэнд нь монгол хүний биеийн онцлогт тохирсон өдөр тутамд өмсөхөд тохиромжтой хэрэглэгчдийг өөртөө итгэлтэй, сэтгэл ханамжтай алхахад туслах зорилгоор үндэсний хэв шинжээ хадгалсан дээл, хувцсыг урлаад багагүй хугацааг өнгөрүүллээ. Тодруулбал “Ивээл” брэндийн үүсгэн байгуулагдсаны нэг жилийн ой тохиож байгаа бөгөөд энэ хугацаанд бүтээсэн ажлаа тайлагнан өнгөрсөн Бямба гаригт Зайсан Хилл цогцолборт загварын шоугаа амжилттай зохион байгууллаа. Тус загварын шоу нь өдөр тутамд өмсөх дээл хувцас, чөлөөт загварууд болон онцгой загварууд гэсэн нийт гурван коллекциос бүрджээ. Нийт 48 шинэ загварын дээлнүүдийг мэргэжлийн загвар өмсөгчид өмсөж сонирхуулсны зэрэгцээ “Шанз 3” , X-Vit амьд хөгжмийн хамтлагууд ая дуугаа өргөсөн юм.

“Ивээл” брэнд нь хэрэглэгчдийн хүсэл сонирхолд нийцүүлэх үүднээс материал дээр анхаарч торго, хамба мөн орчин үеийн хэв загварт тохируулан силк, тор гэх мэт 20 гаран төрлийн материалыг ашиглаж байна.