В.Путин умард Солонгосын удирдагчийн хувийн захидлыг хүлээн авчээ

Умард Солонгосын Ардын дээд хурлын тэргүүлэгчдийн дарга Ким Ён Нам ОХУ-ын Ерөнхийлөгч Владимир Путинтай уулзжээ. Уулзалтын үеэр тэрбээр Умард Солонгосын удирдагч Ким Жөн Уны захидлыг ОХУ-ын төрийн тэргүүнд дамжуулан өгсөн байна. Энэ тухай “ТАСС” агентлаг мэдээлэв.

Ким Жөн Уны хувийн захидлыг гардуулах үеэрээ тэрбээр хэлэхдээ “Төрийн Зөвлөлийн дарга, нөхөр Ким Жөн Унаас таньд чин сэтгэлийн мэндчилгээ дэвшүүлж байна” гэжээ.

“Саяхан болсон Умард  Солонгосын удирдагч Ким Жөн Ун болон АНУ-ын Ерөнхийлөгч Дональд Трамп нарын уулзалтын үр дүнг бид магтан сайшааж байгаагийн сацуу өндрөөр үнэлж байна. Хоёр улсын удирдагчдын уулзалт нь Солонгосын хойгт гарч болзошгүй байсан цэргийн томоохон мөргөлдөөнийг намжааж, асуудлыг энхийн, дипломат арга замаар зохицуулах боломжийг бий болголоо” хэмээн В.Путин энэ уулзалтын үеэр цохон тэмдэглэжээ. Түүнчлэн тэрбээр Умард Солонгосын удирдагчийг Орост айлчлахыг урьсан аж.