Сармагчин өөрийнхөө селфи зургийг эзэмших эрхгүй болов

Индонезийн Сулавеси арал дээр амьдрах Наруто гэх макака сармагчин 2011 онд Британийн гэрэл зурагчин Дэвид Стэйтерийн камераар оролдож байхдаа санамсаргүйгээр өөрийнхөө селфи зургийг авчээ.

Уг зургийг гэрэл зурагчин “Үнэн түүх. Сармагчин өөрийнхөө селфи зургийг авсан” хэмээн гарчиглаад интернэтэд байршуулж байжээ.  Сармагчны зураг цахим ертөнцөд түймэр мэт тархахаас гадна олон сэтгүүлд заларчээ. Зурагчин эр санамсаргүй байдлаар олон саяыг халаасласан байна.

Харин 2015 онд Америкийн амьтны эрхийг хамгаалах “PETA” байгууллага сармагчны зохиогчийн эрхийг хамгаалан, зурагчин эрийг шүүхэд өгчээ.

Эхний шүүх хурлаар тус байгууллагын хүсэлтийг шүүх хүлээн авахаас татгалзжээ. Зурагчин эр шүүх хурлын дараа сармагчны селфи зурагнаас олсон нийт орлогын 25 хувийг макака сармагчныг хамгаалах санд хандивласан байна.

Зурагчны сайхан сэтгэлийг үл тоон тус байгууллага шүүхэд  давж заалдсан бөгөөд Калифорни мужийн шүүх өчигдөр “PETA” байгууллага Наруто сармагчинг төлөөлөх эрхгүй. Танай байгууллага Наруто сармагчинг ашиглан, өөрийн зорилгыг биелүүлэхийг зорьж байна. Сармагчин өөрийнхөө зургийг санамсаргүйгээр авсан. Гэрэл зурагчин түүний эрхийг зөрчөөгүй” хэмээн мэдэгджээ.