Цагаан сарын дараа МАН-д дайн өрнөнө...

Хөшигний цаана өрнөдөг байсан улстөрийн тохироо, хэлцэл, наймааг У.Хүрэлсүхийн ЗГ байгуулагдах үед Монголын ард түмэн анх удаа ил тод мэдэв. "Ойлголцохгүй гээд хаана очих юм" гэж бардаж байсан Ө.Энхтүвшингийн мэдэгдэл, "2020 онд 3-дагч хүчин ялна" гэх Л.Оюун-Эрдэнэийн тунхаглалаас та юу анзаарсан бэ? Монголын улстөрд удахгүй 2 том намын үе дуусгавар болох гэж байна. Намын удирдлагад гарсан бол Монгол төр минийх гэдэг ужиг ойлголт үгүй болох шинжтэй.

Шинэ ЗГ бүрдэх үйл явцад УИХ-ын дарга, МАН-ын дарга М.Энхболд тун чиг ноён нуруутай хандсан. Харин үүний цаана том төлөвлөгөө нуугджээ. 2017 оны 11-12 сард явагдах МАН-ын их хурлаар Ерөнхий сайд У.Хүрэлсүх намын даргын албан тушаалаа авах бололтой. Гэхдээ энэ нь түүний ялалт биш бөгөөд аугаа их ялагдлын эхлэл байхаар зурагдаж байна. Ж.Эрдэнэбат, Ж.Мөнхбат, Н.Номтойбаяр зэрэг залуус 2018 оны хавар улстөрийн томоохон акц өрнүүлнэ. МАН-ын онц их хурлын төлөөх хөдөлгөөн байгуулагдаж, ээлжит бус их хурлыг зарлан хуралдуулахыг шаардах болно. Харин 2016 оноос хойш төсөв, төрийн эрх мэдлийн гадна суусан У.Хүрэлсүхийн талынхан өөрт олдсон бяцхан засаглалын хугацаанд хангалттай олон алдааг хийж амжина хэмээн тэд тооцжээ. Тэр нь ч эхнээсээ хэрэгжиж эхэлсэн. Шинэ сайд нар яам, агентлаг, төрийн алба, төрийн өмчит компаниудад өөрсдийн хүмүүсээ улайран байршуулж, төсөл тендерийг шунаглан үмхэх нь дамжиггүй. Халаа сэлгээ хэдийн эхэлчихсэн, МАН-ын байранд гомдогсдын арми бүрдээд бослогод оролцох уур амьсгал бий болж байна. Одоо хэн ч үүнийг зогсоох аргагүй. 2018 оны намар эсвэл 2019 оны хавар гэхэд Монголчууд бид шинэ ЗГ-аа өлгийдөн авч, У.Хүрэлсүх болон түүний залуус шинэ улстөрийн нам байгуулах үйл явц эхэлнэ. "Фенгшү" С.Ганбаатарын ХҮН намын тавиланг давтчихгүй бол тэд 2020 оныг мөрөөдөх бүрэн боломжтой харагдана.

Жич: 2012 оны сонгуулийн өмнө МАХН-ын нэрийг МАН болгож ялагдуулсан "гэмтэн" У.Хүрэлсүхийн намтар түүх үргэлжилсээр...