Б.Батсайханыг 29-р сургуулийн захирлын албан тушаалд эргүүлэн томилсон байна

Өнгөрсөн дөрөвдүгээр сарын 26-ний өдөр ажлаасаа халагдсан 29 дүгээр сургуулийн захирал Б.Батсайханыг үүрэгт ажилд нь эргүүлэн томилжээ. Одоогоор ямар шалтгаанаар ийнхүү томилсон эсэх талаар тайлбар өгөх хүн алга байна. Хэрэг явдлыг сануулбал, Өнгөрсөн гуравдугаар сарын 27-ны өдөр хөгжлийн бэрхшээлтэй хүүхдүүдийн тусгай сургууль болох Сүхбаатар дүүргийн 29 дүгээр дунд сургуулийн сурагчид хичээл хаялт зарласан. Тодруулбал, сургуулийн сонсголын бэрхшээлтэй сурагчид бусдын адил чанартай боловсрол эзэмших, эх хэл болох дохионы хэлээ чадварлаг эзэмшсэн багш нараар заалгах хүсэлтээ сургуулийнхаа захиргаанд удаа дараа тавьж байсан юм.БСШУСЯ-наас ажлын хэсэг байгуулж тус сургуулийн үйл ажиллагаа болон багш нарын ур чадварын байдлыг шалгасан байдаг. Ажлын хэсгийн дүгнэлтээр нийслэлийн төрийн өмчийн 29 дүгээр сургуулийн захирал Б.Батсайхан нь мэргэжил, ур чадварын хувьд гүйцэтгэж байгаа ажил, албан тушаалдаа тэнцэхгүй болсон, хөдөлмөрийн сахилгын зөрчил гаргасан нь тогтоогдсон юм. Тиймээс Нийслэлийн Засаг дарга Улаанбаатар хотын Захирагч С.Батболд захирамж гаргаж нийслэлийн Төрийн өмчийн 29 дүгээр сургуулийн захирал Б.Батсайханыг 2017 оны дөрөвдүгээр сарын 26-ны өдрөөр тасалбар болгон үүрэгт ажлаас нь халсан билээ.