Б.Бат-Эрдэнэ: Энэ ноцтой асуудлыг нуун дарагдуулсан гэдэг нь үнэн

Ээлжийн ахлагчдаа зодуулж, өвлийн шөнө гадаа нүцгэн зогссоны улмаас хөл нь хөлдөж, 9 хуруугаа тайруулсан цэргийн талаар бид мэдээлсэн. Тодруулбал Дорноговь аймгийн Зүүн Баянгийн 336-р ангид цэргийн алба хаахаар явсан Ж.Баярцогт ээлжийн ахлагчдаа зодуулж, 9 хуруугаа тайруулсан хэрэг гарсан.

Энэ хэрэг 2017 оны нэгдүгээр сарын 17-ны шөнө болжээ. Тэгвэл уг явдлыг салбарын яам нь мэдээгүй байсан бөгөөд асуудлыг хав дарсан байжээ. Энэ талаар салбарын сайд Б.Бат-Эрдэнэ “Цэргийн албан хаагч ахлагчдаа шийтгүүлсний улмаас эрүүл мэндээрээ хохирсон асуудал өнгөрсөн нэгдүгээр сард гарсан байсан.

Энэ ноцтой асуудлыг нуун дарагдуулсан гэдэг нь үнэн. Харин иргэний гомдол мэдээллийн дагуу ийм зүйл болсон гэдгийг олж мэдсэн. Энэ асуудлыг мөн цагдаагийн байгууллагаас эрүүгийн хэрэг үүсгэн шалгаж байгаа” гэсэн байна.