Н.Алтанхуяг: Иймэрхүү явуулга Ерөнхий сайд хийж байхаас эхэлсэн

Ерөнхий сайд асан Н.Алтанхуяг АТГ-ын ахлах комиссар Д.Золжаргалд байцаалт өгөөд дуусчээ. Тэрбээр өнөөдөр 10.30 цагаас хойш байцаалт өгсөн юм. Хууль бус тендерийн хэргээр шалгагдаж байгаа экс Ерөнхий сайдыг өнөөдөр баривчилж магадгүй гэх мэдээлэл байсан. Тэгвэл тэрбээр байцаалтаа өгөөд гарч ирсэн байна. Н.Алтанхуяг өөрийг нь шалгаж байгаа асуудлыг Ерөнхийлөгч Ц.Элбэгдоржтой холбон тайлбарлаж байсан удаатай. Харин АТГ-аас түүнийг мөрдөн байцаалтын ажиллагаанд саад учруулж байгаа талаар мэдээлэх болсноос хойш өмнөх шигээ чанга дуугарахаа багасгасан юм.

Гэхдээ тэрбээр  “Н.Алтанхуяг гэдэг хүнийг Ерөнхийлөгчид нэр дэвшүүлэхгүй байх, Ерөнхийлөгч болчихвол хамаг хэрэг нь илэрчих гээд байгаа айдас хүйдэстэй цөөхөн бүлэг байдаг юм. Тэд ийм ажил хийгээд олон жил болж байна. Иймэрхүү явуулга Ерөнхий сайд хийж байхаас эхэлсэн, Н.Алтанхуягийг Ерөнхийлөгчид нэр дэвшүүлж болохгүй. Ямар ч үнээр хамаагүй зогсоох ёстой гэсэн зорилготой ажлууд яваад байгаа. Засагт ажиллаж байх хугацаандаа ард түмэн, улсын хөгжлийн төлөө, монголчуудыг эх оронд нь сайхан амьдруулахын төлөө чөмгөө дундартал зүтгэсэн. Яагаад ингэж ноцоод ноолоод байдаг юм гэхээр бүлэглэлийнхэн Н.Алтанхуягийг ямар нэгэн байдлаар мөнгө төгрөгтэй холбох юмсан гэсэн бодлого төлөвлөгөөт ажлын үндсэн дээр зургаа, долоон жил ноцолдож байгаа. Угаасаа асуудал гарахгүй болохоор хамаатан, садан ойр хавийнх нь хүмүүсийг шоронд хийгээд Н.Алтанхуяг юу хийсэн, түүнийг хэл гэдэг муухай юм байдаг” гэсэн.

Эх сурвалж: Шуурхай.мн