Жижиг хувьцаа эзэмшигчдийн эрх зөрчигдөж байна гэв

Эрдэнэс Тавантолгой ХК-ийн санхүүгийн асуудал болоод цаашид анхаарах асуудлуудын талаар, мөн жижиг хувьцаа эзэмшигчдийн эрх ашгийн тухай нэр бүхий эдийн засагчид хэвлэл, олон нийтэд  хандаад буй.

УИХ-ын тогтоол, шийдвэрийн дагуу Монгол Улсын иргэн бүр хувьцаа эзэмшигч болж, ЭТТ ХК-ийн 20 хувийг эзэмших болсон. Тэгвэл УИХ-ын тогтоолыг хэрэгжүүлэх явцад Засгийн газар болон толгой компани болох Эрдэнэс MGL ХХК-ийн зүгээс авч хэрэгжүүлж ирсэн алхамууд нь жижиг хувьцаа эзэмшигчдийн эрх ашгийг ноцтой зөрчиж ирснийг тодотгож буй юм.

1,072 ширхэг хувьцааны эзэн болсон Монгол Улсын иргэд нь хуулиар олгогдсон хувьцаа эзэмшигчийн эрхийг эдэлж, тухайлбал мэдээлэл авах, хуралд оролцох, санал өгөх, хүсвэл хувьцаа буюу өөрийн хувийн өмч хөрөнгөө чөлөөтэй захиран зарцуулах эрхээ өнөөг хүртэл хэрэгжүүлж чадаагүй.

Компани нь их хэмжээний хэлцэл хийх, тендер зарлах, урьдчилгаа авах, зээл, өр төлбөр үүсгэхдээ хувьцаа эзэмшигчдийн эрхийг ноцтой зөрчиж, Монгол Улсын холбогдох хууль тогтоомжийг мөрдөөгүй.

Иргэн бүрт хуваарилсан нэг ширхэг Эрдэнэс MGL компанийн алтан хувьцааны эрхийг өнөөг хүртэл баталгаажуулаагүй.

Стратегийн ордын 10 хувийг Монголын хөрөнгийн биржээр олон нийтэд нээлттэй арилжаална гэх хуулийн заалтыг хэрэгжүүлээгүй.

Компанийн санхүү эдийн засгийн үзүүлэлт, тайлан балансыг олон нийтэд нээлттэй мэдээлэх үүргээ хэрэгжүүлдэггүй. Компанийн үйл ажиллагаа нуугдмал байдалд явагдаж иржээ.

Мөн мэдээллээс үзэхэд ЭТТ нь 100 төгрөгийн орлого олохын тулд 136 төгрөгийн зарлага гарган ажиллаж ирсэн. 2011 оноос хойш нийт 24.2 сая тонн сайн чанарын коксжих нүүрсийг сорчилж олборлон экспортолсон ч хуримтлагдсан алдагдал нь 453 тэрбум төгрөг, өр төлбөр нь 822 тэрбум төгрөгт хүрсэн. Олны дунд яригддаг Чалкогийн өр үүнд 8 хуваасны нэг л болно.

Харьцуулахад ЭТТ нь орон нутгийн өмчтэй жижиг гэх тодотголтой ТТ-н олборлолтын зардалтай харьцуулбал 51.3 хувь, Энержи Ресурстай харьцуулбал 106 хувиар өндөр олборлолтын зардалтай ажиллаж байна. Яг энэ арга барилаар үргэлжлүүлэн ажиллавал энэ уурхайн үр ашигтай олборлож болох нөөц нь 8 жилийн дараа дуусахаар байна.

Байдал ийм болсон тул бид нийт хувьцаа эзэмшигчдийн өмнөөс ЭТТ ХК-ийн удирдлага болон том хувьцаа эзэмшигч болох Монгол Улсын Засгийн газарт хандаж дээрх зөрчил дутагддыг арилгаж, компанийн хувьцаа эзэмшигчдийн эрх ашгийг хангах арга хэмжээ авахыг шаардаж буйгаа мэдэгдэж байгаа юм.

Эх сурвалж: Шуурхай.мн