5 хүн амиа алдсан төмөр замын ослуудыг нууцалж байна

Төмөр замын ослоор сүүлийн 10 хоногийн хугацаанд 5 хүн амь насаа алдсан харамсалтай хэргүүд гарсан ч УБТЗ-ынхан нийт ажилчид, энгийн иргэдэд ослын талаар сэрэмжлүүлэг мэдээлэл хүргэж, хөдөлмөр аюулгүй ажиллагааны хяналтаа сайжруулах ёстой байтал эсрэгээрээ хэргийг нууцалж байна.

Тодруулбал, арванхоёрдугаар сарын 29-ний өдөр Чойрын Шивээ-Овоогийн өртөөнд галт тэрэгний туслах найруулагч 20-иодхон настай залуу вагонд зүтгүүр залгах үер дунд нь хавчуулагдаж нас барсан харамсалтай хэрэг гарчээ. 

2017.01.05-ний өдөр Сэлэнгэ аймгийн Шаамар суманд дахин осол гарч хүний амь эрсэдсэн,

2017.01.07-ний өдөр Толгойт өртөөний зам дээр ойролцоогоор 17-18 насны 2 оюутан охин дайруулж газар дээрээ нас барсан,

2017.01.08-ний өдөр Амгалан өртөө - Улаанбаатар хот хоорондын замын 407 км-т 15 настай охин галт тэргэнд шүргүүлж бие хүнд байгаа,

2017.01.09-ний өдөр БЗД-10 “Амгалан өртөө”-ний Төмөр замын зам засварын машинт станцын салбар II зам дээр сэлгээ хийж байсан “ДКУ 4250” мотовозын 946, 98-р вагоны хооронд холбогч найруулагч ажилтай Л /эр.52н/ нь хавчуулагдаж гэмтэн нас барсан зэрэг хэргүүд гарсан байна.

Төмөр замын ослууд хоног дараалан гарч байх энэ үед УБТЗ-ын дарга Д.Жигжиднямаа ээлжийн амралттай явааг эх сурвалжаас мэдээлж байгаа юм. Угтаа 10-хан хоногийн дотор 5 хүний алтан амь эрсдэж, салбарт нь онц байдал зарлах хэмжээний хүнд үе тохиогоод байхад УБТЗ-ын дарга Д.Жигжиднямаа үүрэг хариуцлагаа ухамсарлаж, амралт зугаалгаа дуусгах хэрэгтэй баймаар юм.

ТIME.MN