С.Бямбацогт: Сайханбилэг ч бас хамраа хугалж л байсан

Улс төрийн байдал ороо бусгаа, хүн ардын амьдрал хөлөө олоход хэцүү байгаа энэ үед саарал ордон дотор чухам юу болж байдаг нь “ард” бидний сонорт дэлгээтэй цаас шиг байгаад байдаггүйн нэгэн жишээ бас байна аа. Саяхан УИХ-ын гишүүдийг Төрийн ордондоо нударга зөрүүлж, нэг нэгнээ бэтрээсэн гэх мэдээлэл гарсан. Үүний улмаас Хууль зүйн сайд С.Бямбацогт бэртэж, хөмсгөндөө оёдол тавиулсан гэх шум нисэх болсон. Гэтэл энэ нь андуу ташаа мэдээлэл байж таарчээ. Хууль зүйн сайд С.Бямбацогт хэвлэл мэдээлэлд өгсөн мэдэгдэлдээ "Тийм зүйл болоогүй ээ. Бага зэрэг гэмтэл авсан нь үнэн. Ч.Сайханбилэг Ерөнхий сайд байхдаа зааланд тоглож байгаад хамраа хугалсныг нь бас зодоон хийсэн гээд бичиж байсан. Хүн санаандгүй байдлаар гэмтэл авдаг шүү дээ. Би лав 2009 онд гараа, 2011 онд хөлөө хугалж байсан. Экстрим спортоор хичээллэхэд эрсдэлтэй шийдвэр гаргаснаасаа болоод гэмтдэг. Түүнийхээ адилаар л гэмтсэн" гэсэн хариулт өгчээ.