“ИЗИС-ийн оюутан байна” хэмээн худал хэлж бага насны хүүхдүүдийг залилжээ

“Их засаг олон улсын их сургуулийн оюутан Нарансолонго” хэмээн өөрийгөө танилцуулж бага насны хүүхдийг залилсан хэрэг өчигдөр цагдаагийн байгууллагад бүртгэгджээ. Тиймээс эцэг эхчүүдийг бага насны хүүхэддээ үнэт эдлэл хэрэглүүлэхгүй байхыг мөн хараа хяналтгүй орхихгүй байхыг цагдаагийн байгууллагаас анхааруулж байна.

Юу болсныг тодруулбал Баянзүрх дүүргийн нэгдүгээр хороонд өчигдөр 19.00 цагийн үед 48-р сургуулийн хойд талын 28-р байрны хүүхдийн тоглоомын талбай дээр үл таних эмэгтэй хүн хүүхдүүдийн зүүж байсан ээмэг бөгж, гар утасыг залилан авсан байна” гэсэн мэдээлэл иргэдээс иржээ. Мэдээллийн дагуу шалгахад тус дүүргийн тавдугаар хороонд суух 11 настай эмэгтэй Ц-ийн монетон хос ээмгийг, мөн дүү дөрвөн настай Э-гийн хос монетон ээмгийг,  зургадугаар хороонд суух 11 настай Э-гийн “Samsung Zoom-2” гар утасыг 15 настай эмэгтэй М  гэгч өөрийгөө “ИЗИС-ийн оюутан Нарансолонго байна, буяны ажилд ашиглаад буцааж өгнө” гэж залилан авсныг шуурхай илрүүлэн шалгаж эхэлжээ.

Эх сурвалж: Medee.mn