Р.Бурмаа сайдын буртагтай үйлдэл

Хүнс, хөдөө аж ахуйн яамны захиалгаар “Нямбайгаль даваа” ХХК-ийн ОХУ-аас оруулж ирсэн үрийн будааны хэрэг шуугиан дэгдээгээд байгаа билээ. Ямартай ч эхний ээлжинд ирсэн үрийн будаанаас дээж авсан Мэргэжлийн хяналтын газрын хоёр байцаагч өөр өөр дүгнэлт гаргасан байгаа. Сэлэнгэ аймгийн Мэргэжлийн хяналтын газрын байцаагч Д.Цэрэндулам “Өвчлөлтөй, хог шороотой, гуравдугаар зэргийн үрийн будаа тарьж болохгүй” гэж дүгнэсэн байгаа юм.

Харин Дархан-Уул аймгийн Мэргэжлийн хяналтын газрын байцаагч П.Болормаа болохоор “Хоёрдугаар зэргийн үрийн будаа, хог шороог нь цэвэрлээд тариалж болно” гэж дүгнэлт гаргажээ. Ингээд хоёр байцаагчийн дүгнэлт зөрүүтэй гарсан бөгөөд Хүнс, хөдөө аж ахуйн яам болон Мэргэжлийн хяналтын Ерөнхий газар П.Болормаагийн дүгнэлтийг зүтгүүлж байгаа юм.

Гол учир нь Хүнс, хөдөө аж ахуйн яамнаас үрийн буудай оруулж ирэх сонгон шалгаруулалтын материалд заагдаагүй сортын будаа оруулж ирсэн нь хууль зөрчсөн үйлдлийнх нь нэг. Тэгсэн мөртлөө “ОХУ-ын мэргэжлийн хяналтын байгууллагууд шинээр гарган авсан сортын улаан будааны үрийг тарьж болно гэсэн” гэх болхи бүдүүлэг тайлбар хийж байгаа билээ. Шударгаар дүгнэлт гаргасан байцаагч Д.Цэрэндуламыг ажлаас нь халах, АТГ-аар айлган сүрдүүлж эхэлсэн байна. Монгол Улсын хүнсний аюулгүй байдлыг сахин хамгаалах үүрэг бүхий яам яагаад нэгдүгээр зэргийн сайн үрийн будаа оруулж чаддаггүй юм бэ. Хамгийн хямдхан, гахайнд өгөх дээрээ тулсан улаан будаа оруулж ирчихээд тариаланчидад шахах гэж оролдож буйн цаана юу нуугдана бэ.

Мэдээж үрийн будаанаас ашиг унагах гэсэн аж ахуйн нэгжүүдийн тэмцэл, авлигалын тор нь нэхэгдэж байгаа юм биш үү. Дүгнэлт гаргасан “жараахайнуудтай”-тай тэмцэлдэж байхын оронд оруулж ирсэн, зөвшөөрөл өгсөн томчуудыг нь өнгийгөөд хараасай, хуулийнхан.