Хубилай хааны ордны туурь Хориотой хотын дор нуугдаж байгааг илрүүлжээ

Бээжин хотын ордон музей буюу Хориотой хотын захиргаа саяхан шинэ олдвор илрүүлснээ зарлажээ.

Энэ бол Хориотой хотын дор нуугдаж байгаа Юань гүрний эзэн хаан Хубилайн ордны үлдэгдэл. Хятадын түүхийн нэгэн оньсого болсон Юань гүрний хааны ордны байрлал ийнхүү тодорхой болж байгаа гэнэ.

Музейн судлаачдын ярьснаар тэд эхлээд газар дороос вааран дээврийн хагархай, үлдэгдлүүдийг илрүүлсэн нь 600 гаруй жилийн настай байжээ. Өнгөрсөн онд илрүүлсэн боловч насыг нь тогтоолгох шинжилгээнд өгсний дараа үр дүн нь саяхан гарсан байна.

Одоогийн Хориотой хотыг 1420 оноос эхэлж байгуулан Мин, Чин улсуудын үе үеийн хаад сууж байсан гэдэг.

Харин түүнээс өмнө Монголын Эзэнт гүрний тав дахь их хаан Хубилай 1271 онд Монгол, Хятад, Солонгос болон бусад газар нутгийг нэгтгэсэн Юань гүрнийг байгуулж байсан юм. 1279 онд тэр өмнөд Сүн улсыг эзэлснээр бүх Хятадыг захирсан анхны хятад бус гаралтай хаан болж байв.

Судлаачдын үзэж байгаагаар Юань гүрнээс хойш Мин, Чин улсууд хааны ордноо нэг буурин дээр байгуулсаар ирсэн аж.

Ордон музейн захирал Ли Жи хэлэхдээ Хориотой хотыг босгохын тулд Юань гүрний хааны ордныг бүхэлд нь буулгасан тул тэр цаг үетэй холбоотой олдвор тун ховор байдаг гэжээ.

Одоогийн Хориотой хотын байгууламжуудад сөргөөр нөлөөлөхөөс сэргийлж малтлагын ажлыг өргөн хэмжээнд зохион байгуулахгүйг тэр бас хэлсэн байна.

Эх сурвалж: NewHistorian.com