МАХН-Д ҮЛДЭХ ХҮН БАЙНА УУ?

Монголын улстөрд Н.Энхбаяр ганцаардаж эхэллээ. Түүнийг зовж явахад хань бараа болж явсан нөхөд нь дааж давшгүй дарангуйллыг нь үл тэвчин салж одоцгоож байна. МАХН буюу Н.Энхбаяр гэдэг хүнд хамгийн их нөмөр нөөлөг болж явсан УИХ-ын гишүүн Д.Тэрбишдагва, Ч.Улаан нар МАХН-аас гарч МАН-д элсэхээ нэгэнт мэдэгдээд буй.

Тэгвэл өнөөдөр МАХН-аас хэд хэдэн нэр нөлөө бүхий урлаг соёл, улстөрийн хүмүүс гарч МАН-д элсэж байгаагаа албан ёсоор зарлах тухай шум сонсогдох болов. Тэдний тэргүүн эгнээнд Монгол Улсын Төрийн шагналт, Соёлын гавьяат зүтгэлтэн Д.Төрбат байгаа гэнэ. Угтаа Н.Энхбаярыг баригдаад явахад, цагдан хоригдоход УИХ-ын гишүүн Д.Тэрбишдагва, Ч.Улаан, зохиолч Д.Төрбат гэсэн хүмүүс хамгийн ихээр хамгаалсан. Харамсалтай нь Н.Энхбаярын хувийн ашиг сонирхол нь хэрээс хэтэрч, эрх мэдлийн шуналд автсан учраас эдгээр хүн зайгаа барихад хүргэж байгааг улстөрийн хүрээнийхэн онцолж байна. Энэ байдлаараа улстөр өрнөвөл энэ жилийн сонгуулийн дараагаар МАХН нэг мөсөн улстөрийн тавцангаас арчигдана.

Цаашилбал Н.Энхбаярын улстөрийн карьер нэг мөсөн дуусна гэсэн үг. Уг нь МАН-тайгаа эвсээд энэ удаагийн сонгуульд оролцчихсон бол байдал өөрөөр эргэх байлаа. Гэвч Н.Энхбаяр хоёр Энхболдын дундуур “могой” гүйлгээд золигтоод байсан болохоор МАН эвсэхийг хүсээгүй. Эвсэхээргүй болсон эл шийдвэрээс улбаалж МАХН-ын гишүүд МАН руу цувж эхэллээ. Дараагийн ээлжинд Ж.Сүхбаатар тэргүүтэй хүмүүс МАН-аа бараадахад нэг их гайхаад байх зүйл байхгүй болчихлоо. Учир нь МАХН тэр үед улстөрөөс нэг мөсөн арчигдсан байх учраас…