АТГ БХЯ-ны сайд Ц.Цолмонгийн зөвлөхийг саатуулжээ

Авлигатай тэмцэх газраас Батлах хамгаалахын сайд Ц.Цолмонгийн зөвлөхийг саатуулжээ. Тодруулбал, Батлан хамгаалах яамны сайдын нийгмийн асуудал хариуцсан зөвлөх Ж.Алтансүхийг тус яамнаас зарласан тендерээс авлига авсан гэх үндэслэлээр саатуулсан байна.АТГ-аас түүнийг иргэн М-ээс энэ сарын 25-ны өдөр хээл хахууль авсныг үйлдэл дээр нь илрүүлсэн гэж АТГ-аас мэдээлэв.

Одоогоор түүнд эрүүгийн 201601000081 дугаартай хэрэг үүсгэн мөрдөн байцаалтын ажиллагаа явуулж байгаа аж.  Ж.Алтансүхийг дээрх хэрэгт холбогдуулан Эрүүгийн хуулийн тусгай ангийн 268 дугаар зүйлийн 268.2-т заасны дагуу сэжигтнээр тооцон, цагдан хорих 461 дүгээр ангид саатуулжээ.Одоогоор Ж.Алтансүхээс ямар нэгэн тайлбар аваагүй байгаа аж. Хэргийн талаар өөр эх сурвалжийн мэдээлснээр Ж.Алтансүхийг нэгэн компанийн захирлаас авлига авах гэж байгаа тухай мэдээлэл АТГ-т иржээ.

Энэ дагуу тус газраас гүйцэтгэх ажиллагаа явуулан, их хэмжээний мөнгө авч байхад нь үйлдэл дээр нь саатуулсан байна.Эл хэргийг зарим эх сурвалж Ц.Цолмон сайдтай холбоотой байж магадгүй гэжээ. Учир нь Ж.Алтансүх Ц.Цолмон сайдын найз бөгөөд түүнийг анх БХЯ-ны Төрийн захиргаа удирдлагын газрын даргаар ажилд авч, улмаар Нийгмийн асуудал хариуцсан зөвлөхөөрөө томилсон гэх мэдээлэл байна.