Оюутолгой ирэх сараас Монгол ажилчдыг олон зуугаар нь авна

“Эрдэнэс-Оюутолгой” компанийн гүйцэтгэх захирал Да.Ганболдтой “Ардын эрх” сонинд өгсөн ярилцлагтаа “Гүний уурхайн бүтээн байгуулалт хамгийн багадаа 2-3, цаад тал нь 4-5 жил үргэлжлэх ажил шүү дээ. Тухайлбал, хэдхэн өдрийн дотор 200-300 метрийн туннель ухаж олборлолтынхоо замыг засна гэж байхгүй. Ирэх тав, зургадугаар сараас монгол ажилчдыг олон зуугаар нь ажилд авч эхэлнэ. Оюутолгой төслийн үр нөлөө одооноос л эдийн засагт мэдрэгдэнэ.

Хамгийн наад зах нь Ханбогдод уурхайн орчим хэчнээн гэр барих вэ, эсвэл бүр сэндвичэн байр барих уу, гэр баривал ямар аж ахуйн нэгжээс авах вэ, цахилгааныг нь хаанаас авах вэ, бохирыг нь хэрхэн шийдэх вэ гэх мэт сонголтоо өнгөрсөн саруудад хийсэн. Өнгөрсөн гуравдугаар сард болсон ТУЗ-ийн хурлаар өчнөөн хүнийг багтаах кэмпийн өргөтгөлийг барихаар боллоо. Үүндээ тохирсон төсвийнхөө тодотголыг баталлаа. Ер нь тохирсон ёсоороо бүх ажил эрчимжээд, горимоороо явж байгаа.

Гагцхүү улстөрчид, Сангийн яамны мөнгөний хүлээлт, хүмүүсийн ажилтай болох гэсэн хүлээлт нь, бүр томоор нь авч үзвэл хоёрдогч үр дагавар нь өөр өөрийн гэсэн шат дараалалтай. Энэ бүгдийг нь ойлгохгүйгээр хэзээ ажил эхлэх вэ, эхэлсэн үү гэж яриад байх юм. Бүгд өөр өөрийн гэсэн тодорхой хариулттай. Бүх процесс тус тусынхаа төлөвлөсөн тодорхой хугацааны дагуу явж байгаа” хэмээн онцлон ярьжээ.