Хойд Солонгос залуурт зенитийн пуужин туршчээ

Өнгөрсөн бямба гаригт БНАСАУ-ын удирдагч Ким Чен Ун эх орондоо бүтээсэн залуурт зенитийн пуужингийн шинэ төрлийн туршилтыг удирдан явуулжээ. Энэ талаар Солонгосын цахилгаан мэдээний төв агентлаг /KCNA/ мэдээллэсэн байна. Ким Чен Уныг туршилт явуулсан полигонд тус улсын Агаарын цэргийн хүчний командлагч, генерал Цой Ен Хо болон агаарын довтолгооноос эсэргүүцэн хамгаалах анги нэгтгэлийн цэргүүд угтан авчээ.

“KCNA”-гийн мэдээллэснээр, агаарын байг оновчтой устгадаг эдгээр пуужин нь “орчин үеийн цэргийн шинжлэх ухаан, технологийн бүх шаардлагад нийцжээ”. Ким Чен Ун туршилтын үр дүнд сэтгэл хангалуун байгаагаа илэрхийлж, дээрх туршилт нь “улсын батлан хамгаалах тогтолцоонд шинжлэх ухаан, технологид гол анхаарлаа хандуулдаг” Солонгосын Хөдөлмөрийн намын бодлогын ач холбогдлыг харуулсан гэжээ. Туршилтыг хаана, хэдийд явуулсан тухай KCNA агентлагийн мэдээлэлд дурдаагүй байна.