Дмитрий Медведев 2.5 саяас дээш үнэтэй машин унахыг хориглолоо

ОХУ-ын ерөнхий сайд Дмитрий Медведев засгийн газрын сайд, дарга нарын зардлыг хязгаарлах журамд өчигдөр гарын үсэг зуржээ.

Шинэ журам ирэх оны нэгдүгээр сараас хэрэгжиж эхэлнэ.

Журамд зааснаар сайд болон орлогч нарын унах автомашин 2.5 сая рублиэс (72 сая төгрөг орчим) хямд, 200 морины хүчээс бага чадалтай байх ёстой.

Харин түүнээс доош түвшний дарга нар 1.5 саяас (43 сая төгрөг орчим) хямд машин унах ёстой болжээ.

Бас гар утасны үнийг энэ журмаар хязгаарлаж өгсөн байна. Сайд, түүний орлогч нар 15,000 рублиэс (430,000 төгрөг) бага үнэтэй ухаалаг гар утас хэрэглэх бол түүнээс доош албаны хүмүүс 10,000 рублиэр (290,000 төгрөг) хязгаарлажээ.

Харин компьютер, ноутбуук, таблет зэргийг өөрсдөө мэдэж шийдэх эрх өгсөн байна.