Зургаа авахуулахаар үхдэг гэж итгэдэг хэвээр

Цастын өлгий Түвд орны тухай таатай, таагүй олон мэдээллийг авч байдаг. Улаан орхимжит лам нар, бурханы орон хэмээх хүндэтгэл зонхилох нь бий. Байсгээд гаргадаг бага зэргийн мөргөлдөөн, зулын гол болсон зоригт эрчүүдийн тухай зөндөө л уншсан.

Харин саяхан Түвдээр аялаад ирсэн гэрэл зураг сонирхогч залуу хачирхалтай тайлбар бүхий зураг тавьжээ.

Тойрч суугаад нэг нь нөгөөгийнхөө бөөсийг түүж байгаа хэсэг ядруухан түвд хүмүүсийн зургийг авах гэтэл бүгд тонгойн, бараг л хэвтэж орхиж. Гайхаад учрыг асуутал гэрэл зураг авахуулбал үхдэг гэдэгт тэдгээр хүмүүс өнөөг хүртэл итгэдэг гэж хариулсан гэнэ.

Саяхныг болтол буурай маань “Зураг олон бүү авахуулаад бай. Нас богиносно” хэмээн сануулдаг байсан нь санагдав. Шашин шүтэх нь гэгээрэл, ариусалд тустай ч хэт автваас хар тамхи лугаа хортой гэдэг нь оргүй үг биш юм бол уу.