Тэйлор Свифт муу тогооч

Кантри дуучин Тэйлор Свифт өнгөрсөн гуравдугаар сараас хөгжимчин Калвин Харристэй болзох болсон билээ. Хосыг саяхан сүй тавьсан хэмээн хэвлэлүүд мэдээлэх болсон ч Тэйлор, Харрис нар албан ёсны мэдээлэл хийгээгүй байгаа юм.

Харрис өчигдөр “Daily news” сонинд Тэйлор болон хувийн амьдралынхаа талаар ярилцлага өгсөн тухай “www.dailymail.co.uk” мэдээллээ. Тэрбээр “Тэйлор бид хоёр өнгөрсөн сараас хамтран амьдрах болсон. Хамт амьдрахыг би эхэлж гуйсан. Найз бүсгүйгээсээ хол байхыг хүсээгүй юм. Тэйлор сайн эзэгтэй болохын тулд өөрийгөө дайчилж, өдөрт нэг зүйл шинээр сурч байгаа. Бид гэрлэхийг хүсч байгаа учраас Тэйлор өөрчлөгдөж байгаа.

Харамсалтай нь Тэйлор уран бүтээл зэргээсээ болоод хоолны дамжуунд яваагүй. Тиймээс их тааруухан хоол хийдэг. Үнэнийг хэлэхэд их амтгүй хоол хийдэг. Тэйлорын хичээл зүтгэлийг бодохоор идэхийг хүссэн ч тэр хоол хоолойгоор минь давдаггүй. Тэр муу тогооч. Тун муу тогооч” гэж хэлжээ. Тэйлорын 2009 онд 14.5 сая ам.доллароор худалдан авсан тансаг харшид хос амьдрах болжээ.

Хөтлөгч, Харрисээс “Чи Тэйлорт гэрлэх санал тавьсан гэсэн. Энэ үнэн үү?” гэж асуухад тэрбээр “Энэ асуултад хариулахыг хүсэхгүй байна. Тэйлор хувийн амьдралынхаа талаар ярихгүй байхыг хүссэн. Би Тэйлорыг хүндэтгэж байна” гэжээ.