“Баянгол” дүүрэг цусны төвийн салбартай боллоо

Донорын цус цусан бүтээгдэхүүний аюулгүй байдал, хангамжийг сайжруулах талаар Монгол Улсын төрөөс баримтлах бодлогыг хэрэгжлүүлэх зорилгоор хүн амын дунд сайн дурын авлагагүй цусны донорын эгнээг өргөжүүлж, цус цусан бүтээгдэхүүний нөөцийг нэмэгдүүлэх үйлсэд УИХ-ын гишүүн С.Одонтуяа, С.Эрдэнэ нарын санаачилгаар ЭМСЯ, ЦССҮТ, Баянгол эрүүл мэндийн цогцолборын дэмжлэгтэйгээр Монгол Улсад анх удаа олон улсын жишгийн дагуу БГД-т цус цуглуулах төвийг нээлээ.

Нээлтийн үйл ажиллагаанд Эрүүл мэнд, спортын дэд сайд Д.Атармаа, УИХ- ын гишүүн С.Одонтуяа, ЦССҮТ-ийн дарга Н.Эрдэнэбаяр, Баянгол эрүүл мэндийн цогцолборын дарга Ө. Батжаргал нар болон олон зуун хүнд амьдрал бэлэглэсэн хүндэт донорууд оролцлоо.

Дэлхийн улс орнуудад 1саяас дээш хүн амтай хотод дундажаар цус цуглуулах хэд хэдэн төвтэй байдаг бол Улаанбаатар хотод зөвхөн суурин нэг төв байгаа нь хангалтгүй юм. Тус төвийн үйл ажиллагааг эхлүүлснээр цусаа бэлэглэгч доноруудад үйлчилгээ ойртож, байнгын ,идэвхтэн донорын тоо нэмэгдэж, цус цусан бүтээгдэхүүний нөөц,хангамж сайжирснаар олон зуун хүнд амьдрал бэлэглэсэн буянтай ажил болж байна.