“Боинг”-ийн сүйрэлтэй ОХУ хамааралгүй гэдгийг АНУ хүлээн зөвшөөрлөө

Украины тэнгэрт  Малайзын агаарын тээврийн зорчигч тээврийн онгоцыг салан тусгаарлагчид андууран сөнөөсөн  хэмээн АНУ-ын тагнуулынхан үзэж байна. Америкийн тусгай албадын төлөөлөгчид мягмар гаригт сэтгүүлчдэд зориулан тусгай уулзалт зохион байгуулахдаа энэ талаар мэдээлсэн аж.  Тэдний өгүүлж буйгаар, пуужин хөөргөлтийн цэгт ямар нэгэн орос хүн байгаагүй ба зенит-пуужингийн операторуудыг ОХУ-д сургасан баримт алга байна гэжээ.

“Гол нь үүнийг салан тусгаарлагчид үйлдсэн нь ойлгомжтой” хэмээн уулзалтыг зохион байгуулагчдын нэг мэдэгдсэн байна. “Бид Боингийг буудсан хүний нэр, албан тушаалыг мэдэхгүй, ямар үндэстэн болохыг ч таамаглахгүй байна” гэж АНУ-ын тагнуулын ажилтан өгүүлжээ. Гэвч Малайзын онгоцны сүйрэлд Украины босогчид буруутай гэсэн АНУ-ын засаг захиргааны дүгнэлтийг баталгаажуулах ямар ч техникийн талын тодорхой баримт дурдагдаагүй аж.

Америкийн тагнуулын ажилтнууд өөрсдийн дүгнэлтээ гаргахдаа сансрын хиймэл дагуулуудаас авсан фото зургууд болон төрөл бүрийн олон нийтийн сүлжээний мэдээллүүд дээр үндэслэсэн бололтой.

Уг уулзалт дээр Америкийн тагнуулын албан ёсны төлөөлөгчдийн мэдэгдсэнээр, Украины босогчид одоогоор өөрийн улсын зэвсэгт хүчний  12 онгоц, нисдэг тэргийг устгаад байна гэжээ. АНУ-ын тусгай албаныхан Малайзын онгоцны сүйрэлд Украины цэргийнхэн хамааралтай байх боломжийг эрс үгүйсгэж, уг эмгэнэлт явдал тохиолдсон өдөр гамшгийн бүсэд Украины армийн зенит-пуужингийн төхөөрөмж байгаагүй хэмээн мэдээлсэн байна.

Тэдний хийсэн мэдээллээс харахад, Боингийн сүйрэлд ОХУ шууд хамааралтай байж болох ямар ч баримт байхгүй гэдгээ хүлээн зөвшөөрсөн аж.