“Хулгай хийх хөдөлмөр мөн үү”

Хөдөлмөрийн баатар тамирчин Х.Цагаанбаатар ийн эргэлзэхэд хүрчээ. Учир нь түүний олон сар жилийн хөлс хөдөлмөрөө шингээсэн мөнгөөрөө худалдан авсан гэрийг нь хулгайч ачаад оджээ. Гавьяат тамирчин өөрийн нүүр хуудсандаа “Үр хүүхдүүдээ агаарт гаргах зорилготойгоор Ерөнхийлөгчийн тэтгэлэгт цалингаараа таван ханатай гэр худалдаж аваад Нисэхийн хашаан дотроо барьсан чинь хулгай аваад явчихсан байх юмаа. Хүний хөдөлмөрөөрөө олсон зүйлийг зүгээр ингээд хулгайлаад явахаасаа санаа нь зовдоггүй юм байх даа. Хулгай хийх бас хөдөлмөр юм болов уу? Гар нь татаасай. ХУД-ын цагдаа нар минь сайн ажиллаж хулгайчийг олж өгнө гэдэгт итгэлтэй байна” гэжээ.

Нүүдэлчин түмнээс өвлөсөн монгол гэр бол нүүж суух, барьж буулгахад хамгийн хялбар сонгодог сууц билээ. Үүнийг овжин ашиглагчид сүүлийн үед эрс нэмэгдсэн. Айлын бариатай гэрийг буулгаад ачаад явчихдаг хулгайч нарыг “хөдөө гаралтай” байдгийг албаны хүмүүс тодотгож байсан. Учир нь хотод төрж өссөн хүмүүс бол гэрийг барьж буулгаж мэддэггүй гэнэ. Хөдөө гаралтай хулгайч нарын хуруу хумс бүр ч урт болж, улсынхаа нэрийг тив, дэлхийг цуурайтуулсан сайхан хоёр тамирчнаа үр хүүхдүүдтэй нь хамт гомдоож орхижээ.