Ухамсрын шанаа аваад ухаажсан уу?

Хотын дарга Э.Бат-Үүлийн өмнөөс цор цор хийж, ухамсрын шанаа хүртсэн гэх Эдийн засгийн хөгжлийн сайд Н.Батбаярыг тойрсон дуулиан амар дарагдахгүй нь бололтой. Түүнийг улсын баатраас “шанаа” аваад ухаажаа болов уу,  яагаа бол гэх шинэ яриа дагаж эхлэв. Ямартай ч, хотын дарга нийслэлийн тохижилтод зориулж Эдийн засгийн хөгжлийн сайдаас мөнгө гуйхад “Өгөхгүй, нэг ч зоос өгөхгүй” гэж хэлээд “шанаа” хүртсэн байдаг. Нэг талдаа ч зөв л болов уу, Монголоо өрөнд оруулан байж Чингис бондыг олон улсын хөрөнгийн зах зээлээс босгосон. Гэтэл түүнийгээ аахар, шаахар зүйлд зарцуулах нь алсыг харсан хөрөнгө оруулалт болж чадахгүй. Энэ утгаар нь харвал Эдийн засгийн хөгжлийн сайд гэдийх нь зөв боловч илэрхийлэх талдаа эвгүй зан авир гаргасан нь хотын даргын уурыг барж, шанаа авахаас аргагүйд хүргэсэн шиг байгаа юм.  

Харин хүн бүртэй шахуу хэдэр ёдор аашилдаг сайд хотын даргаас шанаа аваад ухаажаа болов уу, яагаа бол... Сурсан юмыг сураар боож болдоггүй гэдэг шиг одоо ч бас хэн нэгний уурыг хүргээд сэгсэлзэж явж мэдэх л юм. 

Удахгүй хаврын чуулган эхэлнэ, харин тэр үед нугас болох сайдын нэг нь Эдийн засгийн хөгжлийн сайд Н.Батбаяр болох тухай яриа саарал ордноос салах больсон. Тэгэхээр түүний хувьд албан тушаалдаа үлдэхийн тулд ямар домог ярихыг монголчууд сонсох л үлдэж байх шив дээ. Хаврын чуулган ирэх долоо хоногийн даваа гариг буюу дөрөвдүгээр сарын 7-нд нээлтээ хийх учиртай.