Хакухо “Тоёота” брэндийг Монголд авчирна

Сумогийн 69 дэх их аварга Хакухо М.Даваажаргал саяхан эх орондоо ирсэн билээ. Тэрээр энэ удаад Япон улсын “Тоёота” брэндийг Монгол Улсад оруулж ирэх ажлаар ирсэн бөгөөд өнөөдөр хоёр талын бага хэмжээний цайллага, уулзалтад оролцох ажээ. Тэрээр хэлэхдээ “Тоёота компанийн удирдлагатай ах дүүсийн харилцаатай байдаг. Тийм ч учраас энэ ажилд хамтарч ажиллахаар болсон” гэсэн юм. 

Японы мэргэжлийн сумо хэцүү байдалд байхад Хакухо аваргыг “Тоёота” брэндийн удирдлагууд дэмжин ажиллаж байсан бөгөөд хоёр жилийн өмнө Хакухо тэднийг Монголд урьж байжээ. Тэрээр манай улсад ирэхдээ “Монгол хүмүүс Тоёотаг их сайхан хайрлаж, хүндэлж унадаг юм байна. Тиймээс би Хакухо аваргад эх орондоо энэхүү брэндийг оруулж ирэх ажлыг хариуцуулъя” хэмээн хэлж байжээ.