“Архины үнэ нэмэгдэж л байг”

Сүүлийн үед өргөн хэрэглээний барааны үнэ тэнгэрт хадаж байна. Баяр ёслолын өмнөх өдрүүд наймаачид, бизнес эрхлэгчдийн хөлжих боломжийн нэг байдгийг ч хэлэх үү, лангуу түрээслэгчдээс эхлээд үндэсний том үйлдвэрлэгчид хүртэл амандаа орсон үнээ хэлж, дураараа дургицгааж байна. 

 “АПУ” компани гэхэд л “алдагдал хүлээгээд байна” гэх тайлбартайгаар архиныхаа үнийг нэмж, идээний дээж сархадын “нэр хүнд”-ийг өсгөсөнд иргэд мөнгөндөө жаахан харам байгаа бололтой. Харин энэ талаар Ерөнхий сайд Н.Алтанхуяг өчигдөр болсон сэтгүүлчидтэй хийх уулзалтын үеэр байр сууриа илэрхийлэхдээ “Архины үнэ нэмэгдэж л байг” хэмээн дэмжлэг илгээв.  Мэдээж архины хэрэглээг багасгах зөв ч архины үнэ нэмж тэмцэхээсээ илүү иргэдийнхээ ухамсартай “тэмцсэн” нь дээр санагдах. 

Ялангуяа сархадыг идээний дээж хэмээн хүртэн соёрхож, айлчин гийчний дайлдаг Сар шинийн баярын өмнө энэ идээний үнэ нэмэгдсэн нь зохион байгуулалттай явуулга, бизнесийн дэмжлэг юм биш байгаа гэх бодлыг иргэдэд төрүүлж байна. Цагаан сарын дараа нэмж болох л байсан шүү дээ.