Багийн спортод хөрөнгө оруулж эхэллээ

Монголчууд эрт дээр үеэс эрийн гурван наадмаа шүтэж ирсэн билээ. Өнөөдөр баячууд нь хурдны морь уяж, бэл бэнчингээ гайхуулан, өөр хоорондоо өрсөлдөх болсон энэ цаг үед хүүхэд, залууст хандсан спортын төрлүүдийг хөгжүүлэх нь юу юунаас чухал болоод байна. Харин “ХасБанк”-ны хамт олон саяхан хоккейн багтай болсон нь өөрийн эрхгүй бахдах сэтгэл төрүүлэв.  

Энэ маягаар өвлийн спортод зоригтой хөрөнгө оруулж, дэмжиж ажиллах нь өнөөдөр юу юунаас чухал болоод байна. “Багануур” ХК, “Шарын гол” ХК зэрэг уурхайн компаниуд ч хоккейн спортод тунчиг элэгтэй хандаж, дэмжсээр ирснийг хэлэх хэрэгтэй болов уу. Юутай ч “Хас”-чууд “Хасын хүлэгүүд” нэртэй хөлбөмбөгийн багийг ивээн тэтгэж, сагсан бөмбөгийн “Хасын хүлэгүүд” багийг дэмжиж ажиллаж байна. Өнөөдөр Монголын хүүхэд залуус чөлөөт цагаа зөв боловсон өнгөрөөх тал дээр учир дутагдалтай байгааг дээр доргүй мэднэ. Тэгвэл тэдний тоглох дуртай хөлбөмбөг, сагсан бөмбөгийн спортыг дэмжих төдийхнөөр “Хас”-ынханы ажил зогссонгүй. Тиймдээ ч “Хасын хүлэгүүд” хэмээх хоккейн мэргэжлийн багт хөрөнгө оруулжээ. Ийнхүү гурван ч төрлийн багийн спортыг дэмжих болсон “Хас”-ынханд саяхан гар бөмбөгийн баг ивээн тэтгэх хүсэлтийг ч тавьсан сурагтай. Үүнээс харахад удахгүй “Хасын хүлэгүүд” хэмээх гар бөмбөгийн баг мэндэлж мэдэхээр байна.