МҮОНТ-ийг 10 хоног хаавал хэн ч анзаарахгүй байх

Сүүлийн үед Монголын Үндэсний олон нийтийн телевизтэй холбоотой асуудал гарах нь их болсон. Саяхан захирлыгаа огцруулчихсан тус телевизийн санхүүд шалгалт хүртэл орсон. Нэгэн үе хөдөө, хотгүй бүх хүмүүс МҮОНТ-ийн үнэнч үзэгчид байлаа. Харин зах зээл хөгжихийн эрхэнд арилжааны олон телевиз байгуулагдан хэвлэл мэдээллийн салбарт өрсөлдөөнийг бий болгосон. Бүгд л үзэгчдээ татахын тулд шоу, нэвтрүүлэг, цэнгээнт дуу хөгжим, мэдээний чанар, чансаа агууламжаараа өрсөлдөх болов.

Сүүлийн үед олны үзэх дуртай солонгос сериалуудаар хүчээ үзэж байна. Харин МҮОНТ нэгэн хэв маягаараа үйл ажиллагаагаа явуулсаар өдий хүрчээ. Нэвтрүүлгийн тайз, “600”-ийн студи яг л хэвээрээ, өөрчлөлт, шинэчлэлт дутагдаж байгааг олон хүн хэлдэг юм билээ. Үндэсний гэх том телевизэд өрсөлдөгч байхгүй хэмээн итгэдэгийх биз. Ерөнхийлөгчийн сонгуульд нэр дэвшсэн гурван намын нэр дэвшигчийг бүтэн хоёр, гурван цагийн турш зогсоосон нь олон хүний шүүмжлэлийг дагуулсан билээ. Хэдэн жилийн өмнө л ийм арга барилаар халз мэтгэлцээнийг явуулдаг байсан энэ телевиз халагдах цаг нь болж гэдгийг хүмүүс хэлж байсан юм. Түүнчлэн саяхан Цагийн хүрдээр Ерөнхийлөгчийн авторыг өөр хүний автортой сольж гаргасан нь бас л асуудал болов. Энэ мэт гаргасан алдаанууд зөндөө. Хэд, хэдэн кино төсөл амжилттай хэрэгжүүлж Монголын уран сайхны олон ангит кино хийж байгаа нь сайшаалтай боловч өөр үзээд байх юм үнэндээ алга гэдгийг үзэгчид хэлж байна. Тэд тус телевизийг 10 хоног хаахад анзаарах хүн байхгүй биз гэх ч хүмүүс байна.