Н.Номтойбаярын бүрэн эрхийг түдгэлзүүлэх үү?

УИХ-ын гишүүн Н.Номтойбаяр бусад руу хутга барин дайрч, бие хамгаалагчаа гэмтээсэн тухай мэдээлэл өнгөрсөн долоо хоногийн гол дуулиан байлаа. Өнгөрөгч лхагва гаригийн орой 23.00 цагийн орчимд Сүхбаатар дүүргийн зургадугаар хороо, МУИС-ийн хоёрдугаар байрны дэргэдэх “Le Triskell” хэмээх франц ресторанд болсон энэ хэргийн талаар Н.Номтойбаяр гишүүн өөрөө “Би хутгалаагүй. Харин над руу н.Нямдорж гэдэг хүн хутга барьж дайрч, бие хамгаалагч маань өмнүүр орон гэдсэндээ хутгалуулсан” хэмээн хэвлэл мэдээллийн хэрэгслээр залруулга хийсэн билээ. 

Гэвч Н.Номтойбаяр гишүүний мэдээ­лэл хийсний маргааш буюу баасан гаригт Цагдаагийн ерөнхий газраас албан ёсоор мэдээлэл хийж, Н.Номтойбаяр гишүүнд Эрүүгийн хуулийн 181.3 буюу “зэвсгийн чанартай зүйл хэрэглэж танхайрсан, бусдын биед гэмтэл учруул­сан” хэргээр эрүүгийн хэрэг үүсгэн шалгаж байгаа гэв. Уг хэрэг гарсны маргааш “Le Triskell” рестораны ажилтнууд “Манайд хэрэг га­раа­­гүй. Тэд тооцоогоо хийгээд зүв зүгээр гарсан. Харин гадаа гарсан хойноо муудалцсан байж магадгүй” гэж ярьсан. 

Гэтэл эх сурвалжийн мэдээлснээр Н.Номтойбаяр гишүүний хутга барин танхайрсан хэрэг уг ресторан дотор болсон байна. Хэрэг гарах үед уг ресторонд Н.Номтойбаяр гишүүн, “Мун­­­зуй” хочит н.Нямдорж нар хамт хоол идэж байгаад муудал­­цаж, Н.Ном­­­той­­баяр нь “Алалцвал алалцья. Май чи, энэ хутгыг ав” хэмээн хоол идэж байсан хут­­гаа шүүрч, Нямдорж руу дайрчээ. Энэ үед бие хам­гаалагч н.Баттулга түүнийг саатуулахаар ур­дуур нь орж, гэдсэндээ хут­галуулсан. Хутганы үзүүр түүний гэдсэн тус газар 2-3 см гүн орсон ч азаар дотор эрхтэнд гэмтэл учруулаагүй байна. 

Энэ хэргийн мэдээлэл тэр шөнөдөө цагдаагийн байгууллагад хүрчээ. Н.Номтойбаярын бие хамгаалагч байсан гэх н.Баттулга ”УИХ-ын гишүүн Н.Номтойбаяр намайг хутгал­чихлаа” хэмээн цагдаад очжээ. Тухайн үед Н.Ном­тойбаяр гишүүн өөрөө ол­­доо­гүй. Харин мар­­гааш нь уг мэдээлэл интернэтээр цацагд­саны дараа Н.Ном­той­баяр гишүүнийг Сүхбаатар дүүр­­­гийн цагдаагийн хэлтэст дуудаж мэдүүлэг авсан аж. 

Цагдаагийнхан уг хэр­гийн нотлох баримт болгож хүн хутгалсан хутга болон хохирогчийн өмсч явсан цустай цамц, рестораны дотор болон гаднах хяналтын камерт бичигдсэн бичлэг зэргийг хурааж авсан байна. Харин н.Баттулгын хувьд эмнэлэгт хэвтэх шаардлагагүй тул гадуур байгаа бололтой. Цагдаагийнхан “Хохирогчийн биед хөнгөн гэмтэл учирсан, биеийн байдал хэвийн бай­гаа” гэдгийг хэлж байгаа. 

Харин нэр дурьдагд­­сан “Мунзуй” хочит н.Нямдорж өмнө нь “Центрпоинт”-ийн гэх дуулиант хэрэгт холбогдож байсан нөхдийн нэг бөгөөд Ц.Нямтайширын “МАК” ком­пани болон Н.Номтойбаяр нар­тай нэлээд ойр ажилладаг нэгэн гэнэ. Н.Нямдорж ч гэсэн өнгөрсөн долоо хоногт хэвлэлд өгсөн ярилцлагадаа Н.Номтойбаяртай багаасаа та­нил байсан, бүр хаана ямар хэ­­рэг хийж байсныг ч гэрчилж чадна гэсэн үг унагажээ. 

Үүгээр Н.Номтойбаяр хүн хутгалсан, үгүй гэх маргаан эцэслэж байгаа болол­­той. Харин түүний үйлд­­сэн энэ хэрэг УИХ-ын гишүүний бү­рэн эрхийг нь түдгэлзүүлэх үндэслэл болох уу? Үүнийг хуулийнхан шийднэ.

Нэгэнт хохирогч өөрөө гомдол гаргаад цагдаагийн байгууллагад хандсан, уг гомд­лынх нь мөрөөр эрүү­гийн хэрэг үүсгээд байгаа тул Н.Номтойбаяр гишүүн ял авах нь зайлшгүй. Учир нь нэгэнт эрүүгийн хэрэг үүс­гэгдсэн л бол хохирогчтой тохиролцсон, хохирогч нь “гомдолгүй“ гэснээр хэр­гийг хэрэгсэхгүй болгодог хуу­лийн санкц өөрчлөгдөөд байгаа. Гэхдээ хэргийг хэрэг­сэхгүй болгохгүй ч гэлээ хохирогч­той тохиролцсоноор хэргийн зүйлчлэлийг өөрчилж болох талтай. Одоо эрүүгийн хэрэг үүсгээд байгаа 181.3 буюу “зэвсгийн чанартай зүйл хэрэглэж танхайр­сан” гэх зүйлчлэлийг өөрчилж, Эрүү­­гийн хуулийн 99-өөр /”бусдын биед хөнгөн гэмтэл учруулсан” буюу хөнгөн гэмт хэрэг/ зүйлчил­бэл Н.Номтойбаяр гишүүн ялгүй өнгөрч ч болох магад­лалтай юм байна. Нөгөө талаас Н.Номтойбаяр гишүүн уг хэргийг үйлдэх үе­дээ согтууруулах ундаа хэрэг­лэсэн байсан тул “согтуугаар гэмт хэрэгт үйлдсэн” гэдэг нь хэргийг хүндрүүлэн үзэх шалтгаан ч болж болзошгүй. Тэгвэл ирэх намрын чуулган эхэлмэгц түүний бүрэн эрхийн асуудлыг ярихад хү­рнэ. Өөрөөр хэлбэл, уг хэр­­гийн эц­­сийн шийдвэр хуулийнхны  гарт байна.