Барилга дээрээс төмөр унаж, автобусны оройг сүлбэлээ

“Монголын цахилгаан холбоо” компанийн байр буюу олны нэрлэж заншсанаар Төв шуудангийн ойролцоох барилгаас хавтан нурж, зам дээр зорчиж явсан автобус дээр унажээ.

Энэ тухай дуудлага 18 цагийн үед Шуурхай удирдлагын төвийн 105 дугаарт ирсэн байна. Гэвч хэрэг дээрээ хавтан нурсанаас гадна төмөр унаж, автобусны оройн хэсгийн цоо хатган сүлбэжээ. Тухайн автобус нь "Хера Холдинг" компанийн ажилчдын автобус байсан бөгөөд автобусанд хүмүүс сууж явсан ч ослын улмаас азаар хүн бэртэж, гэмтээгүй гэнэ.

Гэвч автобусны дээр зоолттой байсан төмрийг тус барилгын ажилчид автобусны дээр гарч, зоогдсон төмрийг авч, барилгын хашаандаа орсон юм.

Ослын газарт ажиллаж байсан замын цагдаагийн ажилтнууд Шуурхай бүлэг 105-ын алба хаагчид болон цагдаагийн ажилтнууд ирэх хүртэл төмрийг хөдөлгөхгүй байхыг сануулсан ч барилгын ажилчид бөөнөөрөө дайран ирж, хүчээр төмрийг авч зугтаасан байна. Хийсэн хэргийнхээ ул мөрийг ингээд ч болов арилгахыг хүссэн бололтой.