“Гэгээн муза 2013” наадам удахгүй болно

УДЭТ-иас жил бүр уламжлал болгон зохион байгуулдаг "Гэгээн муза 2013" наадам ирэх сарын 27-нд болно. Өдгөө 10 дахь удаагаа зохион байгуулагдаж байгаа бөгөөд уг наадмын санаачлагч нь УДЭТ-ын дэргэд байрладаг Драмын мэргэжлийн жүжигчдийн төв аж. Харин тус төв нь энэ жил нэрээ өөрчлөн “Гэгээн муза” академи болон өргөжин наадмаа олон улсын хэмжээнд хийхээр төлөвлөөд байгаа аж. Энэ удаагийн наадам олон онцлогтой бөгөөд төвийн болон орон нутгийн театруудын 2012 онд бүтээж үзэгчдийн хүртээл болгосон 11 жүжгийн 60 гаруй уран бүтээлч наадамд нэр дэвшин өрсөлдөж байгаа аж. Тэр ч утгаараа энэ жил “Гэгээн муза” наадмын эргэн тойронд хамгийн олон өрсөлдөгчдийн дунд “ширүүхэн” тулаан өрнөх нь ээ.