Зохиолын дууны “нууц ноёнтон”

Т.Батсайхан, Г.Эрдэнэтунгалаг, Л.Банзрагч, Ц.Оюумаа, Л.Чулуунбаатар нарын хамтран дуулсан “Айргаар цэнгэгчийн орон” хэмээх сайхан дуу бий. Уг дууг Д.Хишигбаяр, Р.Дэлгэрмаа нар анхлан дуулсан гэдэг. Энэхүү дууны үгийг түүх судлаач, яруу найрагч Н.Энхбаатар зохиожээ. Энэхүү далд фронтын дайчин МУГЖ Г.Эрдэнэцэцэгийн “Зүгээр ч нэг дурсаагүй”, Г.Өсөхбаяр аваргад зориулсан “Өндөр аварга”, “Чингис хаан” хамтлагийн ахлагч Д.Жаргалсайханы “Сарнайхан” зэрэг дууны шүлгийг зохиосон байх юм. Түүнчлэн Д.Намсрайноров, А.Хосбаяр, Б.Оюунбат, Р.Бадралмаа, Б.Буянжаргал, Э.Төрмандах, А.Түмэн-Өлзий зэрэг залуу дуучдын олонд танигдсан дуунуудын шүлгийг Н.Энхбаатар тэрлэжээ.  “Гүйгүүл морин” дуугаараа алдаршсан Төв аймгийн Бүрэн сумын харъяат А.Хосбаярын “Тэргүүн хамбын нутаг”, “Хайрхан сүмбэр шүтээн”, “Бүсгүй чамдаа”, “Хол чиг ойрхон амраг” зэрэг дуунууд түүний шүлгээр бүтсэн. Эдгээр уран бүтээлчдэд “бэлэглэсэн” бүтээлийн дээжээ эмхэтгэн хос цомог хэвлүүлсэн байна. СТА Л.Болдбаатарын дуулсан “Чамайгаа санахаар...” дуугаараа хос цомгоо нэрлэсэн нь учир жанцантай. Ихэвчлэн хайрын дуунаас бүтсэн учраас цомгоо ийн нэрийджээ. Энэ сарын 25-нд 19 цагаас Н.Энхбаатарын уран бүтээлийн цэнгүүн Монгол Бөхийн өргөөнд болох аж.